ASESORES LINGÜÍSTICOS NA GALICIA ACTUAL
A importancia
atribuída na actualidade á calidade lingüística
e da comunicación está a crear demandas específicas
de profesionais de apoio para garantir un uso adecuado e correcto
do idioma galego. Esta demanda non é nova posto que estivo
tradicionalmente ligada a sectores relacionados coa edición
textual, mais actualmente esténdese a outros ámbitos
e, así, amplíanse tamén as demandas formativas
destes profesionais. Para analizar esta nova situación,
a Sección de Lingua do Consello da Cultura Galega e a Coordinadora
de Traballadores/as pola Normalización Lingüística
celebrarán os días un e dous de xuño un seminario
sobre a figura e o traballo dos asesores lingüísticos
na Galicia actual.
As
necesidades de entidades privadas e singularmente das entidades
públicas están a mudar, así como tamén
as metodoloxías, ferramentas de traballo e mesmo o perfil
formativo dos profesionais do asesoramento
lingüístico. Coñecermos estas mudanzas e compartir
as nosas experiencias profesionais é un obxectivo inicial
para consolidarmos un sector profesional de servizos en emerxencia.
Traballar
sobre un texto, oral ou escrito, ou sobre un produtor de textos
implica diferenzas metodolóxicas e de enfoque do traballo.
Diferenzas que nalgúns casos se materializan en estruturas
de traballo concibidas con obxectivos ben diferentes, mais con
técnicas, ferramentas e dinámicas comúns.
Compartir o que temos en común e o específico de
cada sector en que opere o asesor lingüístico: Administración,
sector editorial e audiovisual, medios de comunicación,
etc., amais de coñecer e compartir a problemática
concreta do traballo diario no contexto galego, proporcionaralles
aos asesores elementos de análise para desenvolver procedementos
orientados a extraer a maior eficacia e a máxima eficiencia
no exercicio do seu labor.
Aínda
máis, é importante tamén entender a posición
do asesor dentro
destes mercados, cales son as súas condicións laborais
ou os diferentes sectores en que se empregan, a necesidade de
crear foros profesionais de intercambio de información
e coñecer e difundir aqueles puntos de referencia profesional
(asociacións, sociedades, etc.) que poden ser de apoio
para todo asesor lingüístico, impulsar a proxección
destes profesionais e, de ser o caso, o recoñecemento da
profesión. Só garantindo a profesionalización
podemos asegurar a calidade nos servizos, o que redunda certamente
na garantía da calidade lingüística e na proxección
social da imaxe da lingua galega.
- Metodoloxía:
O seminario
desenvolverase en mesas de traballo onde o debate moderado será
a ferramenta principal para intercambiar experiencias e información.
Estas mesas serán abertas á intervención
do público
asistente para o que se solicita unha participación activa
co obxectivo de enriquecer o seminario.
- Dirixido
a:
Asesores
lingüísticos, técnicos de Servizos de Normalización
Lingüística e de Servizos Lingüísticos,
correctores, tradutores e todos aqueles profesionais e persoas
interesadas.
