Libro Branco do Teatro en Galicia

O proxecto fundamental da Sección de Música e Artes Escénicas é o

Libro Branco do Teatro en Galicia, un amplo informe sobre o estado da cuestión.

Obxectos de estudio
Metodoloxía de traballo
Borrador

Obxectos de estudio
Á hora de establecer cales eran os ámbitos do mundo das artes escénicas que debían ser obxecto de estudio, establecéronse dez aspectos fundamentais:

- Os ámbitos da creación teatral e as relacións que se establecen entre o teatro e a sociedade galega.
- A formación e cualificación que teñen os actores que traballan nas compañías galegas.
- O exercicio profesional.
- As compañías: situación e perspectivas ás que se enfrontan no momento actual.
- Os espacios teatrais e a súa xestión.
- Os públicos e as liñas de traballo.
- Os autores e a edición.
- A animación teatral. O teatro non profesional.
- O teatro infantil e xuvenil.
- A documentación e a investigación.

Metodoloxía de traballo
No proceso de recollida da información necesaria para poder encher de contidos os distintos bloques que se estableceron como obxectivos que debían ser tratados polo miúdo no LIBRO BRANCO, estableceuse unha metodoloxía de traballo baseada na posta en marcha de dúas ferramentas de investigación.

a) Xornadas
A Comisión levou adiante unha serie de encontros entre aquelas persoas integradas en compañías de teatro ou afeccionados. Cada unha destas xornadas foron organizadas co obxecto de profundar máis nun aspecto concreto do mundo do teatro e da súa vinculación coa sociedade galega. Da realización destas xornadas fóronse extraendo unha serie de conclusións que, debidamente elaboradas, pasarán a formar parte do Libro Branco.

Estas son algunhas das xornadas celebradas:

- I Xornadas de educación teatral: As ensinanzas superiores de arte dramática ( 23 e 24 de outubro de 1998), nas que se abordou a educación teatral e as ensinanzas superiores que reciben as persoas interesadas en dedicarse profesionalmente ó mundo do teatro.

- Galicia e a residencia teatral (28 e 29 de maio de 1999), das que próximametne se van publicaca-las actas do encontro, baixo a coordinación de Manuel F. Vieites.

- Animación teatral (1 e 2 de outubro de 1999)

- O teatro afeccionado. Situación e perpectivas (15 de abril de 2000), nas que se tivo en conta a situación en que se atopa este tipo de teatro e abordaránse as perspectivas ás que se enfrontan nun futuro próximo.

- A xestión dos espacios teatrais (5 e 6 de maio de 2000).

- Xornadas sobre a escrita dramática (26 e 27 de maio de 2000)

b) Enquisas
A segunda ferramenta que se puxo en marcha para consegurir ínformación moito máis puntual e concreta sobre a situación real dos teatreiros e as compañías de teatro galegas foron as enquisas. Fixéronse envíos masivos de dous formularios distintos de enquisas.

Unha, dirixida ós profesionais do teatro, coa finalidade de coñecer aspectos tales como: a súa formación, o tempo que levan dedicados ó teatro, se desenvolven ese traballo profesionalmente ou como afeccionados, etc. A Comisión tamén elaborou unha enquisa dirixida a compañías de teatro tanto profesionais como afeccionadas, na que se lles pedía que remitisen información relativa ó número de membros da compañía, os gastos que teñen no ano, as ganancias, se posúen local propio, etc.

Borrador
Con toda a información recollida por estes dous medios e maila que se vai obtendo mediante chamadas telefónicas ou cartas personalizadas, a Comisión está redactando o borrador do Libro, que se prevía que estivese listo para finais de febreiro de 2001. Este borrador está sendo elaborado polos responsables da Comisión de Teatro, Daniel Villalaín, Manuel Vieites e Dolores Vilavedra.

A continuación o borrador será revisado polo resto dos membros da Comisión e prevese que, entre o mes de xuño e xullo, estea definitivamente listo para pasa-las probas de corrección ortográfica e de imprenta. O obxectivo final é que o informe vexa a luz a finais de ano.
Subir