OS INTERNAUTAS DESCARGARON EN AGOSTO 14.000 COPIAS DO LIBRO DO CCG "OS INCENDIOS FORESTAIS EN GALICIA"

Santiago de Compostela, 5 de setembro de 2006.- O libro "Os incendios forestais en Galicia", editado polo Consello da Cultura Galega (CCG), tivo catorce mil descargas durante o pasado mes de agosto, o que supón un fito na acollida das publicacións que a institución pon ao servizo da sociedade en Internet. "Os incendios forestais en Galicia" convértese deste xeito no documento máis descargado polos internautas nun breve período de tempo e evidencia a preocupación de expertos e público por acceder a información contrastada sobre este problema. Como dato comparativo, a mesma publicación tivo 5.700 descargas en xullo e máis de 500 na primeira semana de setembro.

A extraordinaria cifra das descargas coincidiu coa vaga de lumes que durante o mes de agosto asolaron os montes galegos e mesmo puxeron en grave perigo vidas, facendas e inmobles.

O libro recolle as actas das xornadas celebradas no CCG en novembro de 2005, organizadas pola Sección de Ciencia, Técnica e Sociedade e coordinadas por Francisco Díaz Fierros e Plácido Baamonde. Nese encontro, un foro de reflexión e debate sobre este grave problema, aínda sen solución, subliñouse que "para loitar contra o lume hai unhas medidas a curto e medio prazo que dependen dos servizos contra os lumes e das accións preventivas que se poñan en marcha. Pero hai outras a máis longo prazo que atinxen fundamentalmente aos valores, tanxibles e intanxibles, que se poñen en xogo e que, polo tanto, se deben entender como unha acción cultural de cara a toda a sociedade, algo moi propio e pertinente no campo de actividade do CCG".

O CCG vén ofrecendo a posibilidade de descargar gratuitamente máis de 130 libros e documentos editados pola institución a través do portal www.culturagalega.org e do seu web institucional www.consellodacultura.org, que, en xuño de 2006, obtiveron en conxunto máis de 126.000 descargas.

Consulte de balde o libro

DIRECTORES E CREADORES DANSE CITA ESTA SEMANA NO CCG PARA ANALIZAR A SITUACIÓN DA ARTE CONTEMPORÁNEA

Santiago de Compostela, 3 de xullo de 2006.- A Sección de Artes Plásticas do Consello da Cultura Galega (CCG) celebrará os días 6, 7, 20 e 21 de xullo un seminario que baixo o título "Arte: identidade e globalización" reunirá na capital galega a algúns dos máis destacados creadores, críticos, teóricos e directores de centros de arte da Península, como Lourdes Fernández, directora de ARCO, Rafael Doctor, director do Museo de Arte Contemporánea de León (MUSAC), o creador Santiago Cirugeda e a crítica Anna María Guasch.

O obxectivo do encontro é analizar o que se está facendo en distintos focos artísticos activos na Península que destacan pola súa situación periférica e pola forte presenza da súa identidade e memoria, como Cataluña, País Vasco, Lisboa e a propia Galicia. Trátase de achegarse a como a arte axuda a entender a tensión e a dialéctica que xorde na actualidade entre o local, o contorno inmediato, e o global, o internacional.

Para achegarse á topografía social, cultural e política que afecta a cada unha destas xeografías, participarán no encontro algúns dos máis activos profesionais do sector, axentes que participan da empresa da creación para explicar a súa experiencia e os seus campos de traballo e investigación. Entre a lista de participantes destaca un amplo abano de responsables de destacados centro de arte. Estarán Lourdes Fernández, directora de ARCO, a feira de referenza de arte contemporánea na Península e unha das máis recoñecidas no ámbito europeo; Rafael Doctor, director do Museo de Arte Contemporánea de León (MUSAC), un dos centros de arte punteiros na actualidade; Juan de Nieves, director do Espai d'Art Contemporani de Castelló (EACC); Pedro G. Romero, director do emerxente Centro das Artes de Sevilla, Nuria Enguita Mayo, directora de Proxectos da Fundació Antoni Tàpies e Pedro Lapa, director do Museo do Chiado (Portugal).

O punto de vista dos creadores estará representado na xornada por recoñecidos creadores cunha longa traxectoria, como Santiago Cirugeda e Francesc Abad, xunto a artistas das novas e puxantes xeracións, como Daniel García Andújar e Toño Barreiro. Con eles, nomes como Manuel Vilariño, Antón Patiño e Fernando José Pereira amosarán a puxanza da arte contemporánea en España. Completan o programa críticos, comisarios e teóricos como Anna María Guasch, unha das máis recoñecidas no ámbito nacional, Nilo Casares, Jesús Rubio, Peio Aguirre, Miguel von Hafe Pérez e Javier Hernando.

O último día de traballo, as xornadas estarán dedicadas a Galicia e serán os creadores, directores e críticos galegos os encargados de amosar as súas inquedanzas e perspectivas propias. Concretamente, estarán Alberto Ruiz de Samaniego, crítico de arte e profesor da Facultade de Belas Artes de Pontevedra; Carme Nogueira, artista visual; Pedro de Llano Neira, crítico de arte e investigador; Silvia Longueira, directora da Fundación Luis Seoane e Manuel Olveira, director do CGAC.

Coa celebración deste encontro, a Sección de Artes Plásticas quere continuar aportando novas perspectivas na formación dos profesionais galegos e novos elementos ao debate da creación actual en Galicia. Así, o seminario está dirixido a creadores, estudantes e investigadores de diversas disciplinas, como a Arquitectura, Belas Artes, Humanidades, Historia de Arte e Deseño.

Máis información, programa e inscrición

RAMÓN VILLARES DEFENDE O CARÁCTER SINGULAR DO CONSELLO DA CULTURA NA COMISIÓN DO ESTATUTO

SANTIAGO DE COMPOSTELA, 13 de xuño de 2006.- O presidente do Consello da Cultura Galega (CCG), Ramón Villares, defendeu hoxe o carácter singular da institución e o seu rango estatutario no curso da súa comparecencia na Comisión para a Reforma do Estatuto de Autonomía, no Parlamento de Galicia. Subliñou asemade a independencia, o pluralismo e a autonomía na xestión como características a considerar e manter nunha entidade que cumpre “unha función mediadora entre a sociedade e os poderes públicos e posúe unha lexitimidade de exercicio construída ao longo de 23 anos”.

Para Ramón Villares “o CCG é unha institución representativa da cultura galega, da que forman parte as Universidades, as Academias, as Fundacións e os centros de investigación. Por eso entendo que poida debaterse sobre as funcións, e mesmo sobre a composición, pero conservando sempre a idea do Consello”, dixo. Estas características e funcións, precisou Ramón Villares, fan necesaria a existencia dun organismo como o Consello da Cultura, coa consideración de alta institución do réxime autonómico e concibido con carácter independente e fortemente corporativo.

O presidende do CCG aludiu á necesidade dunha reorientación das súas funcións, máis concibidas na dinamización, ordenación e proxección da Cultura e menos no sentido da defensa e preservación desta. “Concibimos o Consello non como unha academia, nin unha institución de investigación, senón como un centro de alta asesoría no que estean presentes as máis relevantes institucións públicas e privadas de Galicia, cun orzamento público acordado polo Parlamento de Galicia e como un “observatorio” permanente da cultura galega en todas as súas dimensións”, afirmou Villares.

Os voceiros dos tres grupos parlamentarios coincidiron en salientar o traballo desenvolvido polo CCG. Manuel Parga Núñez (BNG), Abel Losada (P.S. de G.-PSOE) e Ignacio López Chaves (PP) fixeron algunhas reflexións sobre a consideración que a Cultura e o Consello deben ter no novo texto estatutario.

FORGES REIVINDICA A CULTURA E O HUMOR PARA REMATAR COA DESORIENTACIÓN DOS CIDADÁNS

Santiago de Compostela, 10 de xuño de 2006.- O humorista Antonio Fraguas “Forges” reivindicou esta mañá no Consello da Cultura Galega (CCG) o papel do humor e a cultura para axudar a rematar coa desorientación dos cidadáns na sociedade actual. No marco da quinta edición dos Encontros Cultura e Concellos “A acción cultural nos espazos urbanos”, Forges expuxo con moito humor e ironía a súa particular visión da cultura e a vida na cidade.

Estas xornadas constitúen unha cita anual fundamental para os actores culturais galegos, para intercambiar información, coñecementos e iniciativas nun fructífero diálogo entre territorios e realidades culturais diferentes. Nesta ocasión, a acción cultural urbana, as súas características, actores e espazos, son os protagonistas do evento, ao que asisten un cento de profesionais.

O debuxante, que colabora en xornais e publicación como El País, El Jueves e Interviú e que vén de publicar “Historia de aquí, la Guerra inCivil desde el desastre del 98 hasta la II República” foi debullando ante os asistentes con moita ironía as claves da vida e a cultura urbana e as súas contradicións: o paro, a vivenda, o tráfico, as relacións de parella, os avances da ciencia, etc. Todo elo para dar conta da “necesidade do humor e a cultura para orientar aos cidadáns”. Así, salientou que a sociedade actual está marcada por unha sobreabundancia de información e “moito ruído de fondo”, polo que animou aos técnicos culturais presentes a traballar para que os cidadáns poidan acceder e adquirir coñecementos veraces e queiran facelo. “O maior inimigo da cultura é o sofá”, dixo Forges.

O debuxante, de pai galego, de A Fonsagrada, tamén destacou como o humor das persoas está condicionado polo tipo de cidade ou vila na que vive e no caso de Galicia asegurou que “o humor na vida cotiá ten unha presenza moi importante”. “Eu, cando me quero rir de verdade fágoo coa miña familia lucense e non en Madrid”, dixo. Do mesmo xeito, tamén quixo aproveitar a ocasión para reivindicar a importancia do humor na educación e na formación das persoas explicando como a súa última obra, que anunciou que será traducida ao galego, será material de apoio das materias de historia nos centros de Secundaria.

ACTORES E ESPAZOS URBANOS

Trala intervención de Forges, a mesa redonda que clausurou os Encontros, amosou distintas iniciativas e propostas para a mellor captación do interese dos públicos. O director do CGAC, Manuel Olveira, referiuse aos públicos como “polimorfos e cambiantes” e chamou a atención sobre a necesidade de atender ás minorías. “A miña experiencia obrígame desde o CGAC, institución pública, a implementar proxectos que resposdan á pluralidade dos públicos”, asegurou.

Nesta mesma idea abundou o actor Xesús Ron, da Sala Nasa, unha iniciativa cultural de carácter privado asentada nun barrio da cidade de Santiago. “ A nosa preocupación é captar novos públicos e traballar moi especialmente coas minorías para servir de contrapunto á actividade importante que acolle cada día a cidade”.

Pola súa banda, Xabier Paz, da Libraría Torga, subliñou a dimensión de “espazo participado” do local que rexenta no casco vello ourensán. “A nosa librería é un pretexto para pór en marcha un proxecto de intervención cultural en distintas direccións, pero tendo sempre presente que cada acto de venda dun libro é en si mesmo un acto cultural”, dixo.

A directora da Fundación Luís Seoane da Coruña, Silvia Longueira, referiuse á importancia de apostar por proxectos relacionados coa cultura contemporánea e subliñou o compromiso de intentar vertebrar diferentes aspectos da acción cultural na Coruña. “A Fundación Luís Seoane deberá aglutinar tamén movementos culturais que están xurdindo o van xurdir na cidade”.

Para rematar, a profesora da Universidade de Vigo Ana Belén Fernández, falou da presenza de Galicia na rede e da importancia e significación dos blogs na acción cultural. Salientou as características de linguaxe próxima, carga opinativa e interacción, que definen estes novos soportes atendidos e seguidos por xente nova, de formación media ou alta e con espírito crítico. Un campo de traballo e de divulgación cultural emerxente que vén enriquecer o espazo creado polos medios convencionais.

UNHA APOSTA POLAS DEPUTACIÓNS

No marco destas xornadas tamén hai que destacar a intervención onte de Eduard Miralles, do Centre d'Estudis i Recursos Culturals de Barcelona Deputación de Barcelona, que se referiu ao ámbito provincial da cultura e o papel das Deputacións. Miralles reivindicou o papel destes organismos na xestión dese espazo intermedio entre a Comunidade Autónoma e o Concello. “O territorio real a administrar é máis pequeno que o autonómico e máis grande que o local-municipal, polo que Provincia e Deputación teñen moito futuro sempre que sexan quen de adaptárense ao marco legal e ás necesidades do territorio”, afirmou.

Desde estas consideracións, Eduard Miralles, convencido de que a cultura non pode ser xestionada hoxe tan só desde a perspectiva local, advertiu contra a decisión de suprimir as Deputacións. “Se non existisen, poida que houbera que inventalas”, dixo.

Pola súa parte, Hector Pose, da Universidade da Coruña, ocupouse das políticas culturais urbanas en Galicia e do seu sentido diferencial. Botou de menos unha estratexia de comunicación global municipal e unha maior facilidade para obter información na súa condición de investigador e estudioso. Tamén invocou a necesidade de máis plataformas de participación cidadá, máis animación sociocultural, máis sensibilidade coa creatividade local, máis traballo en rede con outras cidades e menos predominio do que definiu como “trivialización mediático-cultural”. Pose asegurou que no binomio 2001-2002, tempo do seu estudo, as cidades de Pontevedra e A Coruña “foron as máis eficaces e coherentes nos seus plantexamentos culturais”.

Máis información e fotografía

OS EXPERTOS SALIENTAN NO CCG A ECLOSIÓN DAS POLÍTICAS CULTURAIS EN GALICIA NOS ÚLTIMOS ANOS

Santiago de Compostela, 9 de xuño de 2006.- A quinta edición dos Encontros Cultura e Concellos (CCG) deu comezo esta mañá no Consello da Cultura Galega analizando o fenómeno emerxente das políticas culturais nos municipios ao abeiro da promoción turística e a institucionalización da cultura. Estas xornadas constitúen unha cita anual fundamental para os actores culturais galegos, para intercambiar información, coñecementos e iniciativas nun fructífero diálogo entre territorios e realidades culturais diferentes. Nesta ocasión, a acción cultural urbana, as súas características, actores e espazos, son os protagonistas do evento, ao que asisten un cento de profesionais.

O coordinador principal das xornadas e responsable do Observatorio da Cultura Galega do CCG, Xan Bouzada, destacou na inauguración esta mañá dos Encontros que “Galicia vive nos últimos anos unha eclosión das políticas culturais”. Así, subliñou o aumento extraordinario de técnicos de cultura nos municipios galegos, sinalando que se en 1990 tan só un 15% deles dispoñían deste tipo de persoal, na actualidade arredor do 50% dos concellos contan con técnicos ou xestores culturais. Esta cifra, apuntou Bouzada, é aínda reducida comparativamente con outros focos culturais pero está a medrar moito no campo do voluntariado e agárdase que tamén o faga desde o punto de vista profesional. Este fenómeno, salientou, “evidencia a vontade de institucionalización e municipalización da cultura nos concellos”. No caso concreto das cidades galegas, dixo que “están facendo un esforzo moi importante para estabilizar as súas accións culturais, para transcendelas, renovalas e proxectalas cara ao exterior, cun interese crecente turístico-cultural”.

O auxe destas políticas culturais, explicou Bouzada, está vencellado fundamentalmente a dous factores: ao interese económico e á maior sensibilidade co papel da cultura na sociedade e á súa capacidade de tender pontes entre os colectivos para acadar unha maior cohesión e forxar unha identidade máis definida. “As políticas culturais en Galicia están moi vencelladas a políticas de carácter turístico, para atraer visitantes e crear equipamentos, pero na actualidade o interese económico da cultura materialízase tamén en novos proxectos empresariais emprendedores, na hostelería, na xestión cultural, etc.”, sinalou.

Pola súa banda, o director do Observatorio Cultural do Languedoc-Roussillon, Emmanuel Negrier, un dos maiores expertos europeos en políticas culturais, destacou que “os concellos e as cidades están na primeira liña dos retos das políticas culturais”. Sen embargo, apuntou o paradoxo de que por unha banda se considera que a cultura é un dos elementos fundamentais do desenvolvemento das cidades e por outra o sector cultural público está ameazado polos que consideran a cultura como un ben de luxo e polos que entenden que a cultura é un problema privado e non público.

O presidente do Consello da Cultura Galega, Ramón Villares, fixo pola súa banda fincapé no importante papel que realiza e pode realizar no futuro o Observatorio da Cultura Galega desta institución para “avaliar as políticas culturais que se desenvolven na Comunidade e para propor novos modelos que permitan seguir traballando na promoción cultural en Galicia, unhas das funcións fundamentais do Consello da Cultura Galega”.

Neste primeiro día de traballo tamén expuxeron a súa experiencia no sector técnicos culturais de cidades como Eibar, Guimarães (Portugal), Granollers e da Fundación Barrié de la Maza. Xa pola tarde está prevista a intervención de Eduard Miralles, director do CERC da Deputación de Barcelona, e de Héctor Pose (Universidade da Coruña - Consello da Cultura Galega) e Xan Bouzada (Universidade de Vigo - Consello da Cultura Galega)

PARTICIPACIÓN DO HUMORISTA FORGES

As xornadas continuarán mañá sábado cunha intervención de Antonio Fraguas "Forges" sobre "A Cultura na cidade, vivir a cidade". Xan Bouzada destaca a pertinencia de contar con este humorista nas xornadas porque o seu traballo de reflexión sobre a vida e a cultura na cidade supón un complemento perfecto ao programa técnico. As sesións continuarán cunha mesa redonda sobre os actores e espazos da acción cultural urbana na que participarán o director do CGAC, Manuel Olveira; a directora da Fundación Luís Seoane, Silvia Longueira; Xesús Ron, da Sala Nasa; Xabier Paz, da Libraría Torga-Ourense, e a profesora Ana Belén Fernández. Pechará o encontro o presidente da FEGAMP, Xosé Crespo. Con esta participación, o Consello da Cultura quere abrir as súas portas tamén a experiencias culturais alternativas e a proxectos innovadores.

Máis información e fotografía

O PRESIDENTE DO CONSELLO DA CULTURA PARTICIPOU NOS ACTOS INAUGURAIS DO INSTITUTO CERVANTES DE PALERMO (ITALIA)

Santiago de Compostela, 8 de xuño de 2006.- O presidente do Consello da Cultura Galega (CCG), Ramón Villares, foi convidado a participar nos actos oficiais de inauguración do Instituto Cervantes de Palermo (Italia) e interveu como relator na mesa redonda "Cultura e diversidade", celebrada o pasado 7 de xuño.

No panel, que reflexionou sobre a presenza actual das linguas cooficiais dentro e fora de España e os retos que afrontan, interviron tamén como relatores, Ascensiò Figueres, presidenta da Academia Valenciana de la Llengua; Henrike Knorr, director de Investigación de Euskaltzaindia, e Caterina Ruta, catedrática de Lengua y Literatura Española da Universidade de Palermo.

O Instituto Cervantes de Palermo, ubicado na igrexa de Santa Eulalia de los Catalanes, do século XVII, situada no casco histórico da cidade, foi inaugurado o 5 de xuño polos Príncipes de Asturias, don Felipe de Borbón e dona Leticia Ortiz. Asistiu asemade o ministro español de Asuntos Exteriores, Miguel Angel Moratinos.

O centro de Palermo ven unirse en Italia aos de Roma, Milán e Nápoles e fai o número 47 dunha estructura operativa nos cinco continentes. O Instituto Cervantes é unha institución creada en España en 1991 para promocionar a lingua española, as linguas cooficiais e a cultura dos países hispano-falantes. O seu presidente é o escritor e xornalista galego, César Antonio Molina.

UN CENTENAR DE TÉCNICOS ANALIZAN DESDE MAÑÁ NO CCG AS POLÍTICAS CULTURAIS DAS CIDADES

Santiago de Compostela, 8 de xuño de 2006.- O Consello da Cultura Galega (CCG) reunirá este venres e sábado, días 9 e 10 de xuño, a preto dun centenar de técnicos e axentes culturais galegos e foráneos para reflexionar sobre as políticas culturais nas cidades. A cita será na quinta edición dos encontros Cultura e Concellos, que nesta ocasión xirarán arredor da "Acción cultural nos espazos urbanos". Estas xornadas constitúen unha cita anual fundamental para os actores culturais galegos, para intercambiar información, coñecementos e iniciativas nun fructífero diálogo entre territorios e realidades culturais diferentes. Nesta ocasión, a acción cultural urbana, as súas características, protagonistas e espazos, serán os protagonistas.

O coordinador principal das xornadas, Xan Bouzada, destaca a importancia de analizar este fenómeno xa que “Galicia viviu nos últimos anos unha auténtica revolución nas políticas culturais, unha intensa eclosión que as converten na actualidade en eixes centrais das políticas do concellos”. Deste xeito, sinala, na actualidade as políticas culturais urbanas constitúen un soporte institucional imprescindible para unha articulación social, política e territorial eficiente, capaz de dar conta dos profundos cambios que a nosa sociedade está a experimentar nestes inicios do século XXI.

O presidente do Consello da Cultura Galega, Ramón Villares, inaugurará o encontro o venres ás 10:30 horas. Coa súa intervención darán comezo unhas xornadas que se agarda que reúnan a preto dun centenar de técnicos e axentes. O primeiro día de traballo, exporán a súa experiencia en acción cultural os directores do Centre d'Estudis i Recursos Culturals de Barcelona, Eduard Miralles, e do Observatorio Cultural de Languedoc-Rousillon, Emmanuel Negrier, recoñecido experto europeo en políticas culturais en áreas metropolitanas. Completarán o programa técnicos culturais de cidades como Eibar, Guimarães, Granollers e da Fundación Barrié de la Maza.

FORGES E A CIDADE

O segundo día, as xornadas comezarán cunha intervención de Antonio Fraguas "Forges" sobre "A Cultura na cidade, vivir a cidade". Xan Bouzada destaca a pertinencia de contar con este humorista nas xornadas porque o seu traballo de reflexión sobre a vida e a cultura na cidade supón un complemento perfecto ao programa técnico. As sesións continuarán cunha mesa redonda sobre os actores e espazos da acción cultural urbana na que participarán o director do CGAC, Manuel Olveira; a directora da Fundación Luís Seoane, Silvia Longueira; Xesús Ron, da Sala Nasa; Xabier Paz, da Libraría Torga-Ourense, e a profesora Ana Belén Fernández. Pechará o encontro o presidente da FEGAMP, Xosé Crespo. Con esta participación, o Consello da Cultura quere abrir as súas portas tamén a experiencias culturais alternativas e a proxectos innovadores.

Máis información e programa

OS ASESORES LINGÜÍSTICOS REÚNENSE NO CONSELLO DA CULTURA PARA ANALIZAR A SITUACIÓN DO SECTOR

SANTIAGO DE COMPOSTELA, 31 de maio de 2006.- O encontro “Asesores lingüísticos na Galicia actual” reunirá este xoves e venres, días un e dous de xuño, a técnicos e asesores da lingua galega para analizar a situación do sector. O encontro, organizado pola Sección de Lingua do Consello da Cultura Galega (CCG) e a Coordinadora de Traballadores/as de Normalización da Lingua, xorde ante as novas demandas profesionais e formativas creadas pola crecente importancia adquirida pola calidade lingüística en todos os ámbitos.

Para analizar este novo contexto, participarán no encontro asesores e técnicos lingüísticos de empresas, de departamentos e servizos de normalización lingüística, de medios de comunicación, de editoriais e doutras entidades implicadas no sector. Estes profesionais exporán como están a mudar as necesidades lingüísticas de entidades privadas e públicas, así como tamén as metodoloxías, ferramentas de traballo e mesmo o perfil formativo dos profesionais do asesoramento lingüístico. Coñecer estas mudanzas e fomentar o intercambio de experiencias entre os profesionais é un obxectivo que o CCG considera prioritario para consolidar un sector profesional de servizos en emerxencia.

O encontro, coordinado por Xoán Antón Lado Lago, pretende reunir a representantes de diferentes sectores nos que opera o asesor lingüístico (desde a Administración ao sector editorial) para coñecer as súas condicións laborais e as súas problemáticas concretas de traballo no contexto galego, co obxectivo final de acadar ferramentas que permitan unha maior eficacia no exercicio do seu labor.

Con esta iniciativa tamén se pretende satisfacer a necesidade de crear foros profesionais de intercambio de información e coñecer e difundir aqueles puntos de referencia profesional (asociacións, sociedades, etc.) que poden ser de apoio para todo asesor lingüístico. Persíguese impulsar a proxección destes traballadores porque só garantindo a súa profesionalización se pode asegurar a calidade nos servizos, o que redunda na garantía da calidade lingüística e na proxección social da imaxe da lingua galega.

O seminario, aberto á participación de asesores lingüísticos, técnicos de Servizos de Normalización Lingüística e de Servizos Lingüísticos, correctores, tradutores e todos aqueles profesionais e persoas interesadas, desenvolverase en mesas de traballo onde o debate será a ferramenta principal para intercambiar experiencias e información.

Completa información e programa

PRESENTACIÓN DOS "V ENCONTROS CULTURA E CONCELLOS: A ACCIÓN CULTURAL NOS ESPAZOS URBANOS"

Santiago de Compostela, 31 de maio de 2006.- O Consello da Cultura Galega (CCG) celebrará este xoves, día 1 de xuño, ás 12:30 horas, a rolda de prensa de presentación dos "V ENCONTROS CULTURA E CONCELLOS: A ACCIÓN CULTURAL NOS ESPAZOS URBANOS". Estas xornadas, que se celebrarán os días 9 e 10 de xuño, constitúen unha cita anual fundamental para os actores culturais galegos, para intercambiar información, coñecementos e iniciativas nun fructífero diálogo entre territorios e realidades culturais diferentes. Nesta ocasión, a acción cultural urbana, as súas características, protagonistas e espazos, será a protagonista.

Na rolda de prensa de presentación participarán o coordinador principal dos Encontros, Xan Bouzada, e o secretario do CCG, Henrique Monteagudo.

· DÍA: 1 de xuño de 2006

· HORA: 12:30 horas

· LUGAR: salón de actos do Consello da Cultura Galega. Pazo de Raxoi, 2º Andar. 15704 Santiago de Compostela

O CONSELLO DA CULTURA GALEGA REIVINDICA UN DOMINIO GALEGO PROPIO EN INTERNET

Santiago de Compostela, 24 de maio de 2006.- O Consello da Cultura Galega (CCG) quere amosar o seu apoio oficial á iniciativa dun dominio galego propio (.gal) en Internet. O desenvolvemento nos últimos anos da World Wide Web pon de manifesto a importancia de situarmos á cultura galega cun lugar propio e diferenciado en Internet. A existencia dun enderezo único e fixo na rede para a nosa cultura tería implicacións de orde económica, social e cultural ao permitirmos identificar todos os contidos creados en Galicia coa mesma terminación.

O que se solicita é un sufixo de Internet específico para unha comunidade lingüística e cultural. A Internet Corporation for Assigned Numbers (ICANN) concede terminacións de dúas letras (.es, .fr) para Estados constituídos, e de tres ou máis letras (.org, .edu, .net) para organizacións e, por extensión, para comunidades lingüísticas e culturais. Deste xeito, cando a ICANN concedeu o .cat a Cataluña, en realidade estaba concedéndoo a un espazo lingüístico e social, e non territorial.

A iniciativa dun dominio galego propio en Internet, da que xa se leva falando anos, vén de tomar un novo e decisivo pulo coa constitución da Asociación PuntoGal. Segundo eles mesmos indican, a Asociación PuntoGal conta cunha promotora conformada por representantes da Asociación de Editores de Galicia, da Asociación de Enxeñeiros de Telecomunicacións de Galicia, da Asociación Fillos de Galicia, do Colexio Profesional de Xornalistas de Galicia, do Consello da Xuventude de Galicia, das Empresas Galegas Adicadas a Internet, de Galicia Hoxe, do Idesga-Galego 21, do ISOC-Galicia, da Mesa pola Normalización Lingüística, da Real Academia Galega (RAG) e de Vieiros. A asociación nace coa arela de sumar o maior número posible de apoios sociais á iniciativa e realizará accións de concienciación entre a cidadanía sobre a necesidade de que Galicia dispoña dun dominio propio. O colectivo convida a cidadáns, asociacións, institucións e grupos diversos a unírense á plataforma para avalar a petición diante da Internet Corporation for Assigned Names and Numbers, a ICANN, organismo internacional que decide sobre a solicitude.

O Consello da Cultura Galega, como institución cultural que conta entre os seus obxectivos a promoción e difusión da lingua e da cultura galega, quere sumarse a esta petición dun dominio galego propio en Internet. A presenza en Internet da cultura galega é actualmente imprescindible para situarnos na modernidade e lograr a difusión da nosa cultura tanto dentro coma fóra das nosas fronteiras, ademais de permitir o contacto de todos os galegos espallados polo mundo. Unha terminación común e única daríalle sentido e unidade a todos os contidos galegos da rede.

O CONSELLO DA CULTURA PRESENTA O FACSÍMILE DA OBRA DE MANUEL LUGRÍS "GRAMÁTICA DO IDIOMA GALEGO"

Santiago de Compostela, 11 de maio de 2006.- Co gallo da celebración do Día das Letras Galegas o vindeiro 17 de maio, o Consello da Cultura Galega (CCG) presentará en rolda de prensa este venres, día 12, ás 13:00 horas, a edición facsímile da obra de Manuel Lugrís Freire "Gramática do idioma galego".

A importancia desta obra, que segundo as información da época foi un éxito de vendas sen precedentes, radica en que supuxo unha ruptura coa práctica tradicional ata entón de considerar a gramática do español como norma subsidiaria para o galego. A publicación constitúe ademais unha manifestación do compromiso cívico-patriótico de Lugrís.

Na rolda de prensa participarán o presidente do Consello da Cultura Galega, Ramón Villares; o secretario da institución e coordinador da súa Sección de Lingua, Henrique Monteagudo, e o neto do homenaxeado, Manuel Lugrís Rodríguez.

- HORA: 13:00

- LUGAR: salón de actos do CCG. Pazo de Raxoi, 2º Andar. Santiago de Compostela

FRANCISCO DÍAZ-FIERROS PRESENTA NO CONSELLO DA CULTURA GALEGA A SÚA ÚLTIMA OBRA: "A CUESTIÓN AMBIENTAL EN GALICIA"

O Consello da Cultura Galega (CCG) acollerá este xoves, día 11 de maio, ás 12:00 horas, a rolda de prensa de presentación do libro da Editorial Galaxia "A cuestión ambiental en Galicia", de Francisco Díaz-Fierros Viqueira, vicepresidente do CCG e coordinador da Sección de Ciencia, Técnica e Sociedade desta institución. O acto contará coa participación de Víctor F. Freixanes, director xeral de Editorial Galaxia; Uxío Labarta, biólogo; e Francisco Díaz-Fierros, autor do libro.

Neste libro Díaz-Fierros achéganos a un ensaio no que analiza as orixes e a evolución do pensamento sobre os límites dos recursos naturais da sociedade galega. A cultura ambiental dos galegos e galegas agroma dunha ética e dunha sensibilidade que se configuran ao longo da historia e os problemas ecolóxicos e ambientais que afectan a todo o globo preocupan cada vez máis á sociedade, pero cada cultura reacciona ante eles dunha maneira diferente.

Francisco Díaz-Fierros propón en "A cuestión ambiental en Galicia" un achegamento sobre os límites dos recursos naturais na sociedade galega; para iso centra o seu traballo nun período de tempo esencial, desde mediados do século XVIII, en que se acada un desenvolvemento tecnolóxico que altera considerablemente en en pouco tempo o medio natural, ata 1972, ano no que se celebra o cumio de Estocolmo.

A natureza como recurso, a recepción do pensamento ecolóxico, o enfoque sanitario da problemática ambiental son os eixes ao redor dos cales se desenvolve este ensaio histórico no que se recollen os principais fitos que acabarán constituíndo as raíces e desenvolvemento dunha cultura moi presente na sociedade de hoxe.

FRANCISCO DÍAZ-FIERROS

Catedrático de Edafoloxía e Química Agrícola da Universidade de Santiago de Compostela. Foi Presidente da Sociedade Galega de Historia Natural. Autor de monografías coma As concas fluviais de Galicia. Características e riscos de contaminación difusa (1993) e O medioambiente: do control da emisión á incerteza do risco (2000). Obtivo o Premio da Crítica de Galicia en investigación no ano 1997.

Díaz-Fierros é vicepresidente do Consello da Cultura Galega e coordinador da súa Sección de Ciencia, Técnica e Sociedade. Ademais é membro numerario da Real Academia Galega desde o 28 de setembro do ano 2002.

- DÍA: xoves, 11 de maio

- HORA: 12:00

- LUGAR: salón de actos do Consello da Cultura Galega. Pazo de Raxoi, 2º Andar. Santiago de Compostela

A ARQUITECTURA GALEGA TENDE NOVAS PONTES DE INTERCAMBIO CULTURAL CON CASTELA-A MANCHA E PORTUGAL

SANTIAGO DE COMPOSTELA, 28 de abril de 2006.- A Sección de Arquitectura do Consello da Cultura Galega (CCG) celebrará a vindeira semana, os días 4, 5 e 6 de maio, un gran encontro que baixo o título "A Arquitectura desde Castela-A Mancha, Azores e Madeira" presentará por primeira vez na Comunidade o mellor da creación neste territorios. Case unha vintena de destacados arquitectos, como Manolo de las Casas, Bernardo Rodrigues, Paz + Cal e Fredy César, presentarán aos profesionais e estudantes galegos o mellor das súas obras para establecer un fructífero diálogo cultural entre Galicia e estes territorios, con inquedanzas culturais en moitos casos similares.

O CCG vén analizando nos últimos anos de xeito pormenorizado a arquitectura de distintos focos de especial significación creativa nos nosos días. Froito deste proxecto e baixo o título "Arquitectura e Identidade Cultural" celebráronse diferentes xornadas sobre a situación actual e a historia da arquitectura en Lisboa, Cataluña, País Vasco, Navarra, Madrid, Andalucía e Canarias, onde algúns dos máis destacados arquitectos e teóricos de cada territorio ofreceron un achegamento ordenado e metódico á súa traxectoria e á da arquitectura da súa comunidade.

Continuando neste proceso, o CCG organiza agora as xornadas "A Arquitectura desde Castela-A Mancha, Azores e Madeira", coas que pretende ofrecer por vez primeira en Galicia unha visión ampla e pluriperspectiva da arquitectura neses territorios. Trátase, en realidade, de dúas convocatorias celebradas de xeito sucesivo nas que o nexo de unión serán os debates entre arquitectos e investigadores destes tres territorios. "A pesares de ser áreas moi diferentes entre si, con problemáticas propias e con perspectivas de futuro claramente diferenciadas, son, ao mesmo, tempo, territorios que comparten un presente común de inquedanza cultural, de vontade de renovación e de intención de instalarse na vangarda creativa e investigadora", explica o coordinador da Sección organizadora, Iago Seara.

Tanto Castela-A Mancha como Azores e Madeira son territorios culturalmente pouco explorados fóra das súas fronteiras, quedando en moitas ocasións á sombra das grandes áreas como Madrid ou Lisboa. Sen embargo, nos últimos anos están a dar sinais dunha reactivación cultural de enorme interese que, no terreo arquitectónico, vese reflectida na aparición de novos profesionais e dunha actitude crítica sen precedente nestes territorios. No caso de Azores e Madeira son o propio carácter insular, xunto coa distancia ós grandes centros de ensino e de actividade cultural e unha poboación moi reducida os que tradicionalmente condicionaron este illamento, mentres que en Castela-A Mancha son probablemente a proximidade á capital do estado e a enorme extensión do seu territorio, cunha poboación moi atomizada, os factores determinantes da súa evolución.

O coordinador da Sección de Arquitectura do CCG subliña a importancia que ten para Galicia o coñecemento "de periferias culturais que traballan por atopar o seu lugar dentro da Cultura dos Estados portugués e español e que están a ofrecer interesantes exemplos de independencia creativa e de reflexión arredor do feito arquitectónico sen renunciar por isto á súa tradición cultural".

DIÁLOGO E DIVULGACIÓN

A Sección de Arquitectura quere suscitar con estes encontros a dialéctica entre zonas tradicionalmente moi afastadas, establecer diálogos entre profesionais que xorden de contextos radicalmente diferentes pero que afrontan problemáticas semellantes na súa vontade de modernidade. Deste xeito, preténdese afondar no estudo das claves para o desenvolvemento de áreas tradicionalmente esquecidas, destas illas culturais que traballan por atopar o seu lugar dentro da cultura contemporánea peninsular e que están a ofrecer interesantes exemplos de independencia creativa e de reflexión arredor do feito arquitectónico sen renunciar por isto á súa ampla tradición cultural.

O Consello da Cultura Galega presenta estas Xornadas, coordinadas por Laura Espejo, Arturo Franco e Iago Seara, como resultado dun esforzo por divulgar entre o público galego a actual arquitectura, pero tamén como un paso máis no establecemento de novos lazos culturais e puntos de referencia para continuar traballando na formación dos profesionais e investigadores da arquitectura en Galicia. O obxectivo é establecer diálogos entre profesionais que xorden de contextos radicalmente diferentes pero que afrontan problemáticas semellantes na súa vontade de modernidade, tratando de afastarse de ideas preconcibidas e subliñando as liñas de actividade e de creatividade que nestes momentos están a cobrar forma.

Completa información, programa, inscrición e galería fotográfica

 

O CONSELLO DA CULTURA ACOLLE ESTE MARTES UNHA CONFERENCIA DA PRESIDENTA DA ASOCIACIÓN EUROPEA DE TERMINOLOXÍA

SANTIAGO DE COMPOSTELA, 24 de abril de 2006.- O Consello da Cultura Galega (CCG) acollerá este martes, día 25 de abril, a conferencia 'A cooperación en terminoloxía no contexto internacional' da Prof. Dra. Rute Costa Vilhena, presidenta da Asociación Europea de Terminoloxía (AET) e da Associação Portuguesa de Terminologia (TERMIP). O acto está organizado pola Sociedade Galega de Terminoloxía coa colaboración da Sección de Lingua do CCG.

A celebración desta conferencia enmárcase dentro da liña de traballo da Sección de Lingua da institución, que vén desenvolvendo diversos traballos relacionados coa Terminoloxía desde a creación no seu seo da Comisión Técnica de Linguaxes de Especialidade no ano 2001. Nesta liña de investigación enmárcase, entre outras actividades, a posta en funcionamento dunha lista de correo especializada en terminoloxía (con 329 subscritores/as actualmente), a coordinación de publicacións relacionadas coa materia (actualmente esgotadas e con miles de descargas a través da rede) e a organización de congresos en coordinación con outras entidades, por exemplo o 1º Simposio Galego de Terminoloxía, organizado desde a Sección en colaboración con Termigal. Concretamente, a celebración desta conferencia dá continuidade á celebrada anteriormete pola prestixiosa profesora Teresa Cabré Castellví.

- DÍA: martes, 25 de abril

- HORA: 17.30

- LUGAR: salón de actos do Consello da Cultura Galega. Pazo de Raxoi, 2º Andar. Santiago de Compostela - ACTO ABERTO AOS INTERESADOS

PRESENTACIÓN DAS XORNADAS "A ARQUITECTURA DESDE CASTELA-A MANCHA, AZORES E MADEIRA"

SANTIAGO DE COMPOSTELA, 24 de abril de 2006.- A Sección de Arquitectura do Consello da Cultura Galega (CCG) presentará este martes, 25 de abril, ás 12:30, as xornadas "A ARQUITECTURA DESDE CASTELA - A MANCHA, AZORES E MADEIRA" que se celebrará a vindeira semana, os días 4, 5 e 6 de maio. No encontro, destacados arquitectos, como Manolo de las Casas, Paz + Cal e Fredy César ofrecerán un rico achegamento á arquitectura nestas zonas e á súa obra. A pesar de ser áreas moi diferentes entre si, con problemáticas propias e con perspectivas de futuro claramente diferenciadas, estes tres territorios comparten un presente común de inquedanza cultural, de vontade de renovación e de intención de instalarse na vangarda creativa e investigadora de grande interese para os investigadores e profesionais do sector.

Estas xornadas celébranse no marco do macro proxecto "Arquitectura e Identidade Cultural", que vén analizando nos últimos anos de xeito pormenorizado a arquitectura de distintos focos de especial significación creativa nos nosos días, como Lisboa, Cataluña, País Vasco, Navarra, Madrid, Andalucía e Canarias.Na rolda de prensa participará Alfonso Zulueta de Haz, presidente en funcións do CCG, e Iago Seara, coordinador da Sección de Arquitectura da institución.

- DÍA: martes, 25 de abril de 2006

- HORA: 12:30

- LUGAR: salón de actos do Consello da Cultura Galega. Pazo de Raxoi, 2º Andar. Santiago de Compostela

INTELECTUAIS E MÚSICOS GALEGOS RENDEN HOMENAXE ÁS CANTIGAS DE SANTA MARÍA NUN DISCO DO CCG

SANTIAGO DE COMPOSTELA, 19 de abril de 2006.- O Consello da Cultura Galega (CCG) presentou esta mañá en Santiago o disco "Galicia e as Cantigas de Santa María de Afonso X", de Antoni Rossell & G. Courtly Music Consort. A gravación ofrece un excepcional achegamento musical ao repertorio mariano alfonsino coa colaboración de destacados intérpretes, escritores e intelectuais galegos e foráneos, desde Mercedes Peón, Pascal Caumont e Maria Incoronata Colantuono a Xosé Luis Méndez Ferrín, Xohana Torres, Valeria Bertolucci e Manuel María. No acto de presentación participaron o presidente do Consello da Cultura Galega, Alfonso Zulueta de Haz, e o director do proxecto, Antoni Rossell.

Esta iniciativa pretende ofrecer unha aproximación musical desde o punto de vista galego ás Cantigas de Santa María de Afonso X, un dos cumes da cultura europea medieval polo seu valor literario, pola súa riqueza iconográfica e polo tesouro das partituras que o acompañan. Froito deste afán naceu a gravación "Galicia e as Cantigas de Santa María de Afonso X", unha selección de catorce Cantigas nas voces e música de Antoni Rossell & G. Courtly Music Consort.

A elección do repertorio fíxose, tal e como sinala o Rossell, escollendo “aquelas cantigas que dalgún xeito, pola situación xeográfica, por referenzas ao Camiño de Santiago, etc, poderían situarse en Galicia”. Para acentuar a galeguidade do repertorio mariano alfonsino, tívose especial coidado na inclusión, ademais de intérpretes internacionais, de intérpretes galegos de música tradicional. Deste xeito, no disco participan músicos da calidade de Mercedes Peón, Pascal Caumont, Eliseo Parra, Sonia Reborido, Ana Fernández, Maria Incoronata, Clara Hernández, Iván Costa, Antonio Sánchez, Xavi Lozano, Henrique Peón, Jorge del Río, Julio César Amaro e Belén Mato.

A gravación conta ademais co enorme valor engadido da participación de destacadas voces da cultura galega e foránea, que poñen voz a diferentes fragmentos de texto intercalados en cada tema. como os escritores Xosé Luís Méndez Ferrín, Xohana Torres, Pilar Pallarés, profesores das Universidades de Santiago, Vigo, Xenebra, Haifa, Tréveris, Pisa, Berkeley e Barcelona, (como Henrique Monteagudo, Antón Santamarina, Hans Joseph Niederehe e Aviva Doron), ou a actriz Dorotea Barcia.

Coa participación destes ilustres intelectuais, o Consello quere render tamén homenaxe tamén ao mundo académico que traballou ao longo destes anos no coñecemento do mundo medieval e que moitas veces non acadou a difusión mediática necesaria.

Ademais, o disco conta cunha coidada ambientación a cargo de Carlos de Hita, que introduce nas cantigas paisaxes sonoras procedentes da natureza, como os temporais nas praias de Carnota e o ambiente no porto de Malpica, e de elementos como muíños, claustros e xardíns, lugares que serviron para situar tanto a acción do texto literario como as persoas que protagonizaron a creación e difusión deste repertorio, en especial o seu “autor”, o rei Afonso X.

O presidente do CCG, Alfonso Zulueta, destacou durante a presentación da obra que a edición é froito de cinco anos de traballo e “supón a consecución dun vello soño do Consello da Cultura Galega: dar a coñecer as Cantigas de Santa María universalmente”. O director do proxecto sinalou pola súa banda que “o noso propósito foi realizar un traballo que tivese elementos orixinais e que de algún xeito fosen innovadores, ofrecer unha nova maneira de cantar estas Cantigas”. Para acadalo, o seu primeiro obxectivo foi contextualizar a interpretación nun mundo medieval real, fóra das perspectivas románticas de moitas gravacións actuais. “A nosa concepción deste mundo estriba na acumulación e presenza no disco de diferentes rexistros lingüísticos, culturais e de obras e autores medievais, xa que o universo medieval, o alfonsino especialmente, créase e difúndese nun contexto intertextual e intermelódico”. Así, destaca a reconstrución musical a través da investigación musicolóxica, filolóxica e estética e a ambientación dos temas deste disco, que pretenden situar ao oínte actual no mundo en que vive o home medieval.

Co gallo da edición desta obra, o Consello da Cultura Galega celebrará mañá xoves un concerto de presentación no marco do Refertorio do Pazo de Xelmírez (Praza do Obradoiro) a cargo de Antoni Rossell & G. Courtly Music Consort. No acto participarán os intérpretes Mercedes Peón, Sonia Reborido, Ana Fernández, Iban Costa, Henrique Peón e Jorge del Río, ademais do propio Antoni Rossell. Os sons e a ambientación carrerá a cargo de Carlos de Hita. O acto, aberto ao público, comezará ás 20:15.

SANTIAGO DE COMPOSTELA, 20 de abril de 2006.- O Consello da Cultura Galega (CCG) celebrou este xoves, día 20, un Pleno Extraordinario no que se elixiu a Ramón Villares como novo presidente da entidade en substitución de Alfonso Zulueta de Haz. A candidatura de Villares foi a única presentada e acadou o voto positivo de 23 dos 25 membros do Plenario presentes.

Alfonso Zulueta de Haz foi presidente do CCG desde que asumiu o cargo o 17 de abril de 2002, despois da inesperada morte do seu antecesor, o escritor Carlos Casares. Cumpridos os seus catro anos de mandato, procedeuse hoxe á renovación da presidencia da institución. A elección, seguindo a normativa vixente, fíxose na sede da entidade en Santiago de Compostela, en votación secreta dos membros do seu Plenario, formado por:

- A conselleira de Cultura e Deporte, Ánxela Bugallo

- 15 membros designados en representación das principais institucións culturais da Comunidade: Joaquín Arias y Díaz de Rábago (Fundación Barrié de la Maza), José María Barja Pérez (rector da Universidade da Coruña), Senén Barro (rector da Universidade de Santiago), Domingo Docampo (rector da Universidade de Vigo), Xosé Ramón Barreiro Fernández (presidente da Real Academia Galega), Manuel Cecilio Díaz y Díaz (Instituto de Estudios Xacobeos), Francisco Díaz-Fierros (Seminario de Estudios Galegos), Francisco Fariña Busto (Consello Galego de Museos), Francisco Fernández Rei (Instituto da Lingua Galega), Santiago Nogueira Romero (Academia Galega de Xurisprudencia e Lexislación), Eduardo Pardo de Guevara y Valdés (Instituto de Estudos Galegos Padre Sarmiento), Helena Villar Janeiro (Fundación Rosalía de Castro), Ernesto Viéitez Cortizo (Real Academia Galega de Ciencias) e Ramón Yzquierdo Perrín (Real Academia Galega de Belas Artes Nosa Señora do Rosario). Por motivos de saúde estivo ausente Blanca Jiménez Alonso (Fundación Penzol).

- 10 persoeiros elixidos polo Pleno polo seu destacado traballo nos diversos campos da cultura: Alfonso Zulueta de Haz, Ramón Castromil Ventureira, Henrique Monteagudo Romero, Víctor F. Freixanes, Xosé López García, Ramón Máiz Suárez, Francisco Río Barja, Iago Seara Morales, Andrés Torres Queiruga e Ramón Villares Paz.

Unha vez electo, o novo presidente será nomeado posteriormente por decreto da Xunta de Galicia, por proposta da conselleira de Cultura e Deporte.

BALANCE E AGRADECEMENTOS

Durante a celebración do Pleno, o presidente saínte fixo balance do seu mandato e agradeceu especialmente o apoio recibido. Do traballo feito, Zulueta de Haz destacou con humildade que "foron estes últimos catro anos unha etapa máis na que o Consello quixo cumprir responsablemente as súas obrigas de defensa e promoción dos valores culturais do pobo galego e a consideración como órgano consultivo e asesor dos poderes públicos, esforzándonos por dar resposta aos cambios e requirimentos da sociedade".

"Remato catro anos inesquecibles nos que, coa vosa axuda, puiden seguir prestando colaboración e esforzo no complexo eido cultural ao servizo de Galicia, nai e señora nosa, dedicación sumamente gratificante e chea de ilusións, soños e realidades, que marcan a miña vida" salientou. Nas súas palabras quixo deixar constancia do seu enorme agradecemento polo compromiso, o traballo e o afecto recibido dos traballadores da institución e dos membros do Pleno, Seccións, Arquivos, Comisións Técnicas e moi especialmente da Comisión Executiva (Ramón Castromil, Francisco Díaz-Fierros, Xosé López e Henrique Monteagudo) e do seu xerente, Antonio Montero, por compartir estes anos de "reflexións, desvelos, proxectos e anceios comúns".

Tamén tivo unhas palabras para o novo presidente da institución, Ramón Villares, ao que lle ofreceu "os mellores desexos para o seu labor, no que tamén, como foi no meu caso, de seguro contará co apoio e o afecto de todos". Sobre o futuro do Consello, Zulueta de Haz subliñou a aposta por potenciar e desenvolver plenamente as funcións de alto organismo consultivo e asesor da Administración, política que redundará na súa opinión nunha mellor realización das políticas culturais. "Defender a cultura é defender a identidade e a singularidade dos pobos e velaí o noso reto en tempos de globalización: fronte as tendencias homoxenizadoras temos a necesidade ineludible de defender a nosa lexitimidade cultural e identitaria, a nosa singularidade, aportando ao mundo a nosa potencia creadora e innovadora nun fecundo diálogo pluricultural" destacou.

Pola súa banda, Ramón Villares agradeceu ao presidente saínte e aos membros do Pleno a abrumadora confianza depositada nel na elección e amosou a súa disposición de levar a cabo "un tránsito tranquilo de presidencia". Sobre os plans de futuro, o historiador subliñou a que a súa intención é manter unha liña de traballo de "moita continuidade e algunhas innovacións" que comezará cunha avaliación da situación do Consello, da percepción e expectativas que ten a xente depositadas nel e facer, en base a este estudo, un plande acción. Tamén fixo fincapé na importancia de que a súa elección é froito da votación dos membros dun plenario independente.

Ramón Villares será o quinto presidente que dirixa o Consello da Cultura Galega desde a súa creación en 1983. Precedérono no posto ilustres persoeiros da cultura galega: Ramón Piñeiro López (1983-1990), Xosé F. Filgueira Valverde (1990-1996), Carlos Casares Mouriño (1996- 2002) e o presidente saínte, Alfonso Zulueta de Haz (2002-2006).

O Consello da Cultura Galega é a primeira institución cultural de Galicia, creada o 8 de xullo de 1983 coa súa aprobación unánime no Parlamento de Galicia, de acordo co previsto no artigo 32 do Estatuto de Autonomía e grazas ao esforzo de sobranceiros persoeiros da cultura galega. A súa función é a defensa e promoción dos valores culturais do pobo galego e ser órgano asesor e consultivo da Administración. Está composto por membros representativos das principais entidades culturais da Comunidade e por personalidades destacadas no eido cultural galego. A súa actividade artéllase arredor de trece Seccións (Antropoloxía Cultural, Arquitectura, Artes Plásticas, Ciencia, Técnica e Sociedade, Comunicación, Cultura Galega no Exterior, Dereito, Filosofía e Pensamento, Lingua, Literatura e Industrias da Edición, Música e Artes Escénicas, Patrimonio Histórico e Patrimonio Natural) e catro arquivos (Arquivo de Comunicación, Arquivo Sonoro de Galicia e Arquivo da Emigración Galega e o Centro de Documentación Sociolingüística de Galicia).

Despois da votación, os membros do Plenario acudirán ao concerto "Galicia e as Cantigas de Santa María de Afonso X", interpretado por Antoni Rossell & G. Courtly Music Consort, que terá lugar ás 20:15 no Refertorio do Pazo de Xelmírez. Posteriormente, sobre as 21:15 horas, celebrarase unha cea no Hostal dos Reis Católicos en homenaxe ao presidente saínte do Consello da Cultura Galega, Alfonso Zulueta de Haz. Está previsto que, ademais dos membros do Plenario da institución xa citados asista o presidente da Xunta de Galicia, Emilio Pérez Touriño, presidente de Honra do CCG.

ALFONSO ZULUETA DE HAZ (Vigo, 1924)

Licenciado en Dereito e de profesión notario, Alfonso Zulueta de Haz entrou en 1996 a formar parte do Pleno do Consello da Cultura Galega e en 17 de abril de 2002 foi nomedo presidente do CCG, cargo que desenvolveu ata este momento.

Foi relator no anteproxecto realizado polo Consello da Cultura Galega para a Lei de Dereito Civil Galego e nos Congresos de Dereito Civil Galego entre 1972 e 1985. Exerceu como profesor no Curso de Dereito Galego na Universidade da Coruña e no de Especialización do mesmo Dereito, e así mesmo ten pronunciado conferencias sobre este tema, especialmente aos profesionais de Dereito. Foi membro da Corte arbitral da Cámara de Comercio, Industria e Navegación de Vigo.

Fundador e primeiro presidente do Ateneo de Pontevedra (1966-1969), tamén foi o fundador e primeiro presidente do Padroado de Educación e Cultura de Gaucin (Málaga), cidade onde exerceu por primeira vez como notario. Este organismo foi creado para contrarrestar o paro estacional que padecía esta comarca a través da preparación das persoas para exercer outro tipo de empregos distintos aos agrícolas. Tamén ocupou o cargo de vicepresidente do Cine - Club de Pontevedra entre 1962 e 1976. Foi ademais presidente do Consello Social da Universidade de Vigo (1996-2003).

Rector do Colexio Maior Universitario para Graduados "César Carlos" de Madrid entre 1955 e 1956, ocupou o cargo de secretario do Comité Hispano-Británico de intercambio entre as Universidades de Madrid e Oxford nos mesmos anos. Posteriormente foi o fundador e primeiro vicepresidente do Partido Galego Social Demócrata (1974-1978) e persoeiro do Partido Galeguista.

O cargo de presidente do Consello da Cultura Galega compatibilizouno co de vicepresidente primeiro e membro do Consello de Administración de Caixanova; fundador e presidente da Fundación Tutelar Galega para Minusválidos Psíquicos Sálvora; fundador e membro do Padroado e Asesor Xurídico da Asociación Juan XXIII para Deficientes Psíquicos; fundador e presidente da Fundación Pedras Vivas; presidente da Editorial SEPT (Sociedade de Estudios, Publicacións e Traballos), responsable da tradución e a publicación da Biblia en galegos desde as lingua orixinais; vicepresidente da Fundación Penzol; conselleiro da Editorial Galaxia; Académico de Honra da Academia de Lexislación e Xurisprudencia de Galicia; membro da comisión para a constitución da Fundación Gonzalo Torrente Ballester e vocal do seu padroado; vocal da Fundación Wenceslao Fernández Florez e do Padroado da Confederación Española de Fundaciones, entre outros cargos.

Por último, indicar que Alfonso Zulueta foi distinguido coa primeira clase da Orde de San Raimundo de Peñafort e coa Medalla Castelao.

RAMÓN VILLARES PAZ (Cazás, Xermade- Lugo, 1951)

Ramón Villares é membro electo do Pleno do Consello da Cultura Galega desde 2003, ano no que comezou a dirixir o seu Arquivo da Emigración Galega e a Sección de Cultura Galega no Exterior. É Doutor en Historia desde 1980 e Catedrático de Historia Contemporánea da Universidade de Santiago de Compostela desde 1987.

É autor de máis de setenta publicacións, entre as que destacan libros como La propiedad de la tierra en Galicia, 1500-1936, (1982), Foros, frades e fidalgos, Estudos de historia social de Galicia, (1982), Galicia. A Historia, (1984) (con versión en lingua española e portuguesa), Figuras da nación, (1997), El mundo contemporáneo, siglos XIX y XX, (2001) (en colaboración con A. Bahomonde) e Historia de Galicia (2004). Tamén foi editor de libros como Donos de seu, (1988) e de Señores y campesinos en la península ibérica, siglos XVIII-XX, (1991) (en colaboración con Pegerto Saavedra).

Decano da Facultade de Xeografía e Historia (1986-1990) e Rector Magnifico da Universidade de Santiago (1990-1994), membro fundador e Presidente (1996-2002) da Asociación española de Historia Contemporánea, foi Director en Galicia da UIMP desde 1998 ata 2006. Dirixiu dezaseis Teses de doutoramento e vinte Memorias de Licenciatura, ademais de ter sido tamén Investigador Principal de cinco Proxectos de Investigación (CYCIT e Xunta de Galicia), así como de varios Convenios de Asistencia Técnica.
Realizou estadías de investigación na Universidade de Bologna (Italia) e no centro "Alcide Cervi" de Roma, ademais de ser Profesor convidado na Ecole de Hautes Etudes (París) e no Instituto de Ciencias Sociais (Lisboa). Forma parte do Consello Editorial de Marcial Pons, Ediciones de Historia e pertence ao consello asesor de revistas como Ayer (M.Pons Ediciones de Historia), Historia Social (Valencia), Hispania (Madrid), Ler Historia (Lisboa) ou Perspectivas Históricas (México).

A COMUNIDADE BLOGUEIRA GALEGA E PORTUGUESA DÁSE CITA ESTE MÉRCORES NO CONSELLO DA CULTURA

SANTIAGO DE COMPOSTELA, 18 de abril de 2006.- A Sección de Comunicación do Consello da Cultura Galega (CCG) celebrará mañá mércores, día 19, “EnBlogs’06: Encontro de blogs de Galicia e Portugal”. Durante a reunión, presentarase Blogoteca, o primeiro sistema aberto e gratuíto de creación e xestión de blogs en galego, que dará resposta á gran demanda existente entre a comunidade blogueira galega de ter un sistema propio. Ademais, no encontro daranse a coñecer dous importantes estudos sobre a blogosfera galega, sobre as súas características e perfís: o sociólogo Fernando Garrido (Observatorio da Cibersociedade) fará públicos os datos galegos da III Enquisa a Webloggers, e a investigadora Silvia Canabal, do Grupo de Novos Medios da USC, amosará os resultados dun estudo sobre a demografía blog en Galicia.

O encontro, ao que asistirán unas 150 persoas, pretende reflexionar sobre os grandes e pequenos temas que rodean a creación de bitácoras: a tecnoloxía, o marco legal, os cambios sociais, as experiencias persoais e colectivas de creación, difusión e distribución de información e ideas a través deste formato.

Con esta convocatoria, o CCG quere abrir as súas portas ao debate, a reflexión e o intercambio entre os membros da comunidade blogueira galega e portuguesa e a todos os interesados nos novos fenómenos de comunicación en Internet. A súa Sección de Comunicación, que analiza dende hai máis dunha década os cambios producidos na comunicación e na sociedade pola irrupción das novas tecnoloxías, non podía ser allea ao fenómeno dos blogs: diarios persoais na web e o formato emerxente máis coñecido deste novo movemento. Na actualidade, cóntanse por centos o número de blogs activos en Galicia e Portugal que, en moitos casos, comparten e intercambian ideas e contidos. Este fenómeno forma parte da tendencia que nos últimos anos levou a Internet a gañar unha importante dimensión social: ferramentas accesibles e unha maior facilidade no acceso á informática facilitan a proliferación de novas voces que enriquecen a cultura, multiplican a presenza da lingua galega na rede e abren novos camiños para a comunicación e a creación.

BLOGUEIROS E EXPERTOS

Para dar conta desta tendencia, o EnBlogs’06 está pensado como unha xuntanza dun día de duración. Pola mañá, diferentes expertos debaterán sobre as cuestións globais que afectan aos blogs e aos movementos sociais na rede. Marcus Fernández (codigocero.com) falará sobre o futuro dos blogs e as últimas tendencias tecnolóxicas asociadas a esta ferramenta; Fernando Garrido (Observatorio da Cibersociedade) describirá como medra a sociedade blog e Víctor Salgado (Avogado, Pintos & Salgado Asociados, A Coruña) e Javier de la Cueva (Avogado, Barcelona) analizarán os dereitos de autor e marco legal en Internet. Pola súa banda, Silvia Canabal (Grupo de Novos Medios da USC) e Manuel Pinto (Universidade de Braga) exporán a demografía blog en Galicia e Portugal e Amador Loureiro (dorfun.bitacoras.com) a sindicación de contidos.

Pola tarde, dez blogueiros contarán en primeira persoa as súas experiencias de creación. Como nas propias bitácoras, todas as intervencións serán puntos de partida para unha conversa aberta a quen desexe participar desde o público. A primeira mesa será sobre “A creatividade dixital asociada ás bitácoras”, estará moderada por Pedro Silva (www.blogaliza.org) e contará coa participación de Berto Yáñez (www.aduaneirossemfronteiras.org); Catuxa Seoane (deakialli.bitacoras.com); Paulo Querido (pauloquerido.net/blogportugues) e María Yáñez (www.todonada.com). Seguiralles outra mesa sobre “A diversidade das historias”, moderada por Ascárida (orballo.f2o.org/weblog) e coa participación de Manuel Bragado (bretemas.blogspot.com), Miguel Vila (www.colineta.com), Isaac Cordal (www.alg-a.com) e Mónica André (b2ob.blogspot.com). Por último, Juan Varela (periodistas21.blogspot.com) falará sobre “Xornalismo de cidadáns, un novo desafío para o xornalismo de calidade”.

Para rematar, o encontro de blogueiros trasladarase entón ao Casino de Santiago, onde baixo o título “Beers & Blogs” terá lugar un encontro informal e aberto a calquera que queira compartir experiencias cibernéticas.

A xornada está organizado por Xosé López, coordinador da Sección de Comunicación do CCG; Rosa Aneiros (Sección de Comunicación) e Manuel Gago (director de culturagalega.org). O Comité Científico que o avala está formado por Alfonso Zulueta de Haz (presidente do Consello da Cultura Galega); Xosé López e Henrique Monteagudo (CCG, USU); Rosental C. Alves (University of Texas); Anibal Alves e Manuel Pinto (Universidade do Minho); Jorge Pedro Sousa (Universidade Fernando Pessoa do Porto); Emilio Prado (Universitat Autònoma de Barcelona); Xosé Rúas e Alberto Pena (Universidade de Vigo); e María del Carmen Pérez Pais e Antonio Sanjuán (Universidade da Coruña).
EnBlogs´06 entróncase coa celebración do VII Congreso Internacional da Comunicación Lusófona en Compostela (LUSOCOM), un evento de grandes dimensións que reunirá a profesionais e investigadores dos diferentes ámbitos da comunicación lusófona no mundo a partir do día 20 de abril de 2006.

Máis información e programa

A REVISTA ESTUDOS DE COMUNICACIÓN ANALIZA NO SEU ÚLTIMO NÚMERO A FORMACIÓN AUDIOVISUAL EN GALICIA

SANTIAGO DE COMPOSTELA, 6 de abril de 2006.- A Sección de Comunicación do Consello da Cultura Galega (CCG) analiza no último número da súa revista Estudos de Comunicación a formación audiovisual en Galicia e o traballo xornalístico en América de tres figuras da cultura galega: Carlos Velo, Suárez Picallo e Blanco Amor. Ademais, no recén editado terceiro volume desta publicación, destacados investigadores estatais e internacionais ofrecen un achegamento a temas históricos e de actualidade no ámbito da comunicación, desde a o fenómeno da "manta radio" ata a fotografía publicitaria en Galicia.

Estudos de Comunicación Nº 3-4 contén un monográfico no que oito formadores de comunicación audiovisual, como Xaime Fandiño, Manuel González e Emili Prado, achegan a súa visión sobre a ensinanza neste sector e sobre os proxectos educativos dos centros que en Galicia ofertan estes estudos. A publicación ofrece unha panorámica sobre os estudos de comunicación en Galicia, desde a Escola de Imaxe e Son de Ourense ata o recente nacemento das Facultades de Comunicación Audiovisual no marco dun puxante crecemento do audiovisual galego.

Pero sobre todo, a obra aborda os retos que ten que afrontar a formación audiovisual. Manuel González, da Universidade de Vigo, apunta algunha destas posibles liñas estratéxicas de futuro: creación de centros de alta especialización, maior coordinación entre as universidades que imparten estudos de comunicación audiovisual, actualizar as infraestructuras técnicas e humanas destes centros, establecer un programa permanente de actualización profesional, estimular a investigación, a creatividade e o talento e fomentar a alfabetización audiovisual da sociedade galega. A esta listaxe, Xosé Ramón Pousa, da Universidade de Santiago de Compostela, engade que "a política educativa ten que fomentar, ademais das destrezas técnicas, o respecto pola diversidade cultural, formar profesionais sensibilizados co fortalecemento da nosa cultura fronte a tendencia uniformizadora dos medios de comunicación de masas".

Da importancia de avanzar na formación audiovisual, Alberto Pena, da Universidade de Vigo, destaca nesta publicación que "no contexto transformador que vive a industrial audiovisual galega, a formación dos profesionais desempeña un papel transcendental para consolidar e para contribuír decisivamente ao desenvolvemento de proxectos innovadores que convertan a Galicia nun polo atractivo para un sector en expansión".

ALÉN DO MAR

Ademais de afondar na formación dos profesionais do sector audiovisual, a revista tamén dedica un especial tratamento á produción xornalística en América de tres destacados intelectuais galegos. A través dunha investigación da profesora Esperanza Mariño, podemos coñecer a traxectoria conxunta de Eduardo Blanco Amor e Ramón Suárez Picallo desde que en 1924 inician a codirección en Bos Aires da revista cultural Céltiga. A publicación continúa o periplo de Blanco Amor por numerosos xornais americanos onde realizou colaboracións, como La Nación, El Mercurio, La Hora e El Día, e cabeceiras de órganos galegos como Acción Gallega, Céltiga, Terra, El Despertar Gallego, Galicia e Galicia Emigrante. "Neste labor prolífico -sinala o profesor Xosé Rivero- Blanco Amor destacou pola súa ambición literaria, a dedicación aos temas galegos -tanto culturais como de xeración de conciencia propia- e o gusto pola expresión barroca".

Completan este achegamento polo exilio creativo Luís Álvarez Pousa e Miguel Anxo Fernández, que realizan un minucioso percorrido pola traxectoria persoal e profesional do cineasta galego Carlos Velo, un dos representantes máis ilustre do exilio galego.

Por último, indicar que a revista contén tamén un amplo abano de artigos de investigadores estatais e internacionais sobre diversos temas relacionados co sector, como o fenómeno da "manta radio" en España, a fotografía publicitaria en Galicia, as comisións fílmicas, o discurso electoral ou as promocións de vendas dos xornais.

Consulte a publicación de balde

Número anteriores de Estudos de Comunicación