O INFORME
DO AUDIOVISUAL EN GALICIA 2001 APUNTA "O BO CAMIÑO"
DO SECTOR NA SÚA ESTRUCTURACIÓN
A dependencia do sector audiovisual galego da CRTVG, que exerce
unha forte influencia como factor dinamizador da producción
audiovisual en Galicia, e o proceso de estructuración que
este sector está vivindo centran o Informe do Audiovisual
en Galicia 2001 que esta mañá foi presentado no
Consello da Cultura Galega pola catedrática de Comunicación
Audiovisual da Universidade de Santiago, Margarita Ledo Andión.
Este informe
do Observatorio Audiovisual Galego (ODA), elaborado por un equipo
de investigadores do Departamento de Ciencias da Comunicación,
recolle a producción audiovisual en stock entre 1999 e
2000, no que respecta á producción de ficción,
documental, animación e multimedia, xa que se deixan fóra
actividades coma a dobraxe, publicidade e promotoras musicais.
Segundo as labores de investigación levadas a cabo durante
dous anos son 107 os productos, entre obras únicas e seriadas,
que son susceptibles de poder ser vendidas, o que representa unha
suba do 72,5 por cento respecto do bienio estudiado anteriormente
(1997-1998).
“Aínda
non se pode falar de sector”
Sen embargo, tal e como indicou a directora do proxecto, "aínda
estamos na fase de estructuración do sector pero existen
unha serie de indicativos que poñen de manifesto que estamos
no bo camiño", indicios entre os que destacou a boa
rendibilidade que presentan os productos audiovisuais, o aumento
dos contratos ou a grande volatilidade das empresas. A pesares
disto, Margarita Ledo recalcou que aínda non se pode falar
de sector porque non está recoñecido como tal polo
Instituto Nacional de Estatística e o seu volume de negocio,
de 8.000 millóns, aínda non é moi importante
se o comparamos con outros sectores galegos, "pero xa se
está tomando conciencia da necesidade de facer esta estructuración",
asegurou Margarita Ledo.
Outra das
conclusións que se poden extraer do Informe elaborado polo
ODA é a dependencia que o sector audiovisual ten da televisión
pública, algo que se pon de manifesto se se compara a situación
deste sector en Galicia coa que presentan outros países
da periferia atlántica como son Gales e Bretaña,
cos que se comparou a estructura do sector coa pretensión
de localizar esgos constitutivos. Neste sentido, a directora do
ODA destacou que esta dependencia "é das productoras"
porque "desenvolver estas iniciativas entra dentro das competencias
da Televisión de Galicia".
O problema,
a distribución
Margarita Ledo tamén puxo fincapé no feito de que
un dos problemas cos que se atopa o sector audiovisual galego
é a distribución, xa que hai productos moi rendibles
pero que "atopan moitas dificultades para chegar a outras
áreas que aínda non están abertas ou exportadas".
A este respecto a profesora Ledo falou da necesidade de facer
maiores investimentos na subtitulación, que é moito
máis económica que a dobraxe, e que permitiría
exportar productos a outras áreas "que non presentan
ningún problema na comprensión dos contidos".
Este informe,
no que tamén se apuntan novos camiños de investigación
como a análise da programación e das audiencias,
encádrase dentro do programa de investigación Tv
e interculturalidade: comunicación na Periferia Atlántica,
que desenvolve o Departamento de Ciencias da Comunicación
da Facultade de Ciencias da Comunicación.
Durante a
rolda de prensa tamén se presentou a web do Observatorio
do Audiovisual Galego no que se recollen os proxectos de investigación
que se están levando a cabo, encabezados polo informe que
se presentaba hoxe, así como un apartado de enlaces coas
distintas institucións e organismos cos que colabora o
ODA entre eles, o Consello da Cultura Galega, e as bases de datos
que se irán actualizando a medida que vaia chegando información
sobre novas produccións audiovisuais.
Enlace
relacionado: http://www.usc.es/xorna/oda/index.htm
