A presidenta, Rosario Álvarez, o vicepresidente, Xosé Manuel Núñez Seixas, e a responsable de Acción Exterior, Emilia García, mantiveron xuntanzas de traballo co director do Instituto Cervantes de Nova York, Ignacio Olmos, e mais a xefa de actividades culturais desa institución, Ana Vázquez, para fixar accións que se concretarán nos vindeiros meses. Tamén resultou do máximo interese a visita, organizada polo Consulado español de Nova York, á Hispanic Society of America, institución cultural e filantrópica fundada no 1904 por Archer M. Huntington, que ten como misión preservar e espallar o legado histórico, artístico e documental de todos os territorios iberoamericanos, Filipinas e países lusófonos. A delegación do CCG, acompañada do cónsul para asuntos culturais en Nova York, Juan J. Herrera de la Muela, foi recibida polos conservadores da institución onde visitaron os seus fondos bibliográficos e artísticos. Neste encontro sentáronse as bases de futuras colaboracións institucionais, nomeadamente no relativo á localización e pescuda de fondos publicísticos e literarios galegos -ou relacionados con Galicia- no inxente acervo bibliográfico da entidade, cuxa recatalogación continúa a día de hoxe.
Desde a súa chegada, a delegación do CCG estivo en estreito contacto coa colectividade galega para abrir novas vías de traballo e colaboración, como a iniciada coa Casa de Galicia de Nova York, logo dunha primeira avaliación do seu acervo documental. A institución, fundada no 1940 co concurso de sobranceiros personaxes da Galicia do século XX, como Alfonso R. Castelao, conta con importantes fondos cuxa dixitalización podería ser de interese para o Arquivo da Emigración, tanto documentais, como as fichas de alta e baixa dos asociados desde os seus inicios, libros de actas, de asembleas, coma fotográfico.
Inicio do ciclo de conferencias
O programa de actos contemplou as dúas primeiras mesas redondas das catro programadas polo CCG con ocasión da exposición “Os Adeuses”. Na primeira, celebrada na sede do Instituto Cervantes neoyorquino, tratouse o tema da Galician Immigration in New York na que participaron, ademais de Xosé Manoel Núñez Seixas, catedrático de Historia Contemporánea da USC, o xornalista galego residente en Washington, Alberte Avendaño, e mais os profesores James Fernández, catedrático de Antropoloxía da New York University; e Alex Alonso, profesor de Estudos Hispánicos no Brooklyn College (City University of New York). No debate abordáronse as características xerais e específicas da emigración galega ás Américas e nomeadamente á cidade de Nova York, as causas da partida dos galegos cara os EUA, as modalidades de inserción socio laboral dos inmigrantes galegos na cidade, o seu protagonismo dentro da comunidade ibérica, e mais a evolución recente da comunidade galega nos EUA -e de Nova York en particular- con especial atención ás últimas vagas de inmigrantes posteriores a 1945 e mais á situación actual das institucións galegas na cidade.
Unha das máis prestixiosas institucións académicas do mundo, o Barnard College, da Universidade de Columbia, acolleu a segunda das citas previstas para falar sobre Galician Immigration to the US and Latin America in comparative perspective, na que participaron o profesor José C. Moya, da Columbia University (un dos máis asonados especialistas mundiais na análise comparada das migracións) e os profesores Alex Alonso e Núñez Seixas. No evento, que tivo boa acollida polo público, salientáronse as características xerais da emigración galega cara a América nunha perspectiva comparativa con outras nacións emigrantes europeas (dende os irlandeses aos italianos); os matices diferenciais entre a súa inserción socio laboral nos EUA e mais nos principais países receptores da América Latina, e as principais características dos relatos literarios e memorialísticos verbo das migracións galegas. O debate posterior aos relatorios foi boa mostra do interese que as migracións galegas espertan no mundo académico norteamericano, e constituíu unha consagración da escola de estudos migratorios galegos e mais da actividade que nese labor vén desenvolvendo o CCG dende hai máis de quince anos.
Este extenso programa de actividades continuará con outras dúas mesas redondas no mes de marzo. Unha versará sobre “A Memoria”, e a outra sobre “Pasado, presente e futuro da cultura galega”. A profesora Dolores Vilavedra participará nas palestras, acompañada de personalidades do mundo académico e institucional da galeguidade en Estados Unidos, e actuará como representante do Consello da Cultura Galega na súa condición de secretaria da súa comisión executiva.