A sétima sesión dos “Encontros monográficos co Patrimonio Cultural”, que se desenvolven no Consello da Cultura Galega desde hai uns meses poñen desta volta o foco nunha cuestión de actualidade: a paralización ou modificación de obras por mor dun achado arqueolóxico. Unha cuestión de ampla repercusión social e que se revisa nun momento especialmente idóneo xa que coa crise hai menos casos. Como conciliar os intereses documentais e preservacionistas dos investigadores, cos dos propios promotores das obras (ben inmobiliarios ben doutro tipo) a partir do estudo de dous casos é o cometido desta xornada coordinada por Teresa Nieto.
O programa
A sesión pivota entre dous casos: dunha banda analizarase o achado dunha Factoría de Salga na rúa Marqués de Valladares en Vigo e, da outra, o Templo Romano descuberto no Círculo das Artes de Lugo. Do primeiro caso falarán os arqueólogos Xulio Carballo, da consellería de Cultura, Educación e Ordenación Universitaria; Adolfo Fernández, da Universidade de Vigo e Soledad Prieto Robles, da empresa que realizou a intervención. No caso lucense falarán os arqueólogos Gonzalo Meijide, da consellería de Cultura, Educación e Ordenación Universitaria; Enrique González, do concello de Lugo e Roberto Bartolomé que foi o director da intervención.
A sesión complétase cunha pequena historia da xestión da arqueoloxía urbana en Galicia a cargo de Xulio Carballo arqueólogo da consellería de Cultura na delegación de Pontevedra.
Un foro de debate e reflexión
Os “Encontros monográficos co Patrimonio Cultural” son unha nova proposta da Sección de Patrimonio e Bens Culturais do Consello da Cultura Galega que pretenden poñer o foco sobre actuacións en marcha acerca de bens do patrimonio galego. Fanse con carácter periódico e pretenden participar tanto na caracterización dos bens como na formulación dos tipos de protección deses bens. Insírense nunha liña de traballo da Sección de Patrimonio e Bens Culturais da institución, que busca xerar debate e difusión entre a cidadanía, as administracións e os profesionais arredor de bens patrimoniais sobre os que se estean a desenvolver actuacións. O Museo das Peregrinacións, o Camiño de Santiago, as fortificacións romanas ou as igrexas medievais centraron sesións anteriores destes encontros.