A xornada pretende ofrecer as claves para unha cultura como a galega ante un novo contexto, caracterizado pola perda do espazo e do tempo como referencia e a participación activa por parte da cidadanía. Unha sociedade en rede que multiplica as posibilidades para que as nosas manifestacións culturais interactúen e contribúan a xerar coñecemento. Sobre esta idea redundarán os cincos relatorios previstos na xornada “Desafíos para a cultura galega no escenario interactivo”, que se desenvolverá na sede do Consello da Cultura Galega.

O programa
A xornada arrinca cunha conferencia do catedrático da Universidad de Málaga, Juan Antonio García Galindo, que, baixo o título “Tempo, Espazo e Comunicación cultural na sociedade dixital”, teorizará sobre o contexto actual. Macial Muriano ofrecerá o punto de vista da mocidade, ao centrarse nos modos de interacción nas redes sociais e na cultura por parte dos máis novos. Os relatorios da mañá conclúen coa intervención de Carlos Elías, da Universidad Carlos III de Madrid, sobre as oportunidades para comunicar cultura.

Xa na sesión da tarde, Rosa Franquet, da Universidad Autónoma, dará claves sobre como situar a identidade propia no marco do novo escenario cultural. Pecha a sesión Mario Tascón, un consultor experto en redes sociais, que falará sobre a creación de contidos, a diversidade e a identidade na sociedade interconectada.

Esta actividade sitúase nunha liña de traballo que incita á reflexión sobre a situación actual e que procura dar claves para que os actores culturais teñan unha maior incidencia social e consigan unha maior eficiencia. Unha liña de traballo baixo a que se organizaron xornadas como “Cultura e comunicación no século XXI” ou “Xogar coa cultura”, entre as máis recentes.