14/10/2008

---

<img src="http://consellodacultura.org/files/2008/10/pres_primeirosdiarios.jpg" alt="pres_primeirosdiarios.jpg" />

<em><div id="pedefoto">Fernando Salgado, Ramón Villares e Xosé Ramón Barreiro, na presentación da publicación que se levou a cabo no Salón de Actos</div></em>

<em>Santiago de Compostela, 14 de outubro de 2008.</em>- A publicación PRIMEIROS DIARIOS GALEGOS 1908-1909, editada polo Consello da Cultura Galega en colaboración coa Secretaría Xeral de Comunicación da Xunta de Galicia é unha contribución “singular, espléndida e oportuna sobre o nacemento da prensa galega”. Así a definiron Ramón Villares, Presidente do CCG; Xosé Ramón Barreiro Fernández, Presidente da Real Academia Galega, e Fernando Salgado, Secretario Xeral de Comunicación. Trátase de mais de dúas mil páxinas en catro volumes que inclúen: “Estudos críticos” e as edicións facsimilares de “Diario de Santiago”; “Apéndice al Primitivo Diario de Santiago”, “Gazeta de la Coruña” e “Telégrafo Político y Literario de la Coruña” e “Diario de la Coruña”. Da coordinación da edición ocupáronse Xosé López García e Rosa Aneiros.


<ul><li><a href="http://consellodacultura.org/mediateca/?p=437">Descargue o prólogo da publicación na Mediateca do Consello</a></li></ul>

<!--more-->

A publicación aparece o ano que sinala o bicentenario da Guerra da Independencia contra o exército francés e reforza a atención que desde o CCG se prestou e presta á comunicación. “É unha obra da que se pode aprender”, segundo Ramón Villares, quen agradeceu a colaboración da Secretaría Xeral de Comuniciación para poder recuperar en edición facsimilar as primeiras c abeceiras galegas nacidas en 1808 e desaparecidas en xaneiro de 1809 coa chegada dos franceses a Galicia.

Xosé Ramón Barreiro Fernández subliñou o feito de que “por unha vez Galicia non perdeu o tren dos acontecementos” e fixo notar que entre 1808 e 1815 houbo aquí 43 xornais impresos, a cifra mais alta nese momento en España. Para o Presidente da Real Academia Galega esta publicación “dignifica a conmemoración da efeméride histórica”.

Fernando Salgado, Secretario Xeral de Comunicación da Xunta de Galicia, apuntou que o estudo dos primeiros diarios galegos “nacidos en tempo de guerra, como arma de propaganda e movilización, ilustra tamén sobre a complicidade entre o poder e os medios de comunicación”.

A explicitación das diferenzas entre absolutistas e liberais e a convulsión causada pola invasión dos exércitos de Napoleón son o escenario dos nacemento dos primeiros diarios galegos cunha clara vontade informativa e de opinión.. Como precisan Xosé López e Rosa Aneiros, “As referencias contínuas ao contraste das informacións, a verosimilitude dos datos, a figura do redactor, o recurso estilístico da primeira persoa no relato informativo, a nomenclatura empregada, as referencias xornalísticas a outros medios españois e europeos como fontes, ou mesmo a apelación directa aos lectores son elementos que nos fan abandonar o estilizado discurso literario de “El Catón Compostelano” (1800) e comezar a falar de prensa informativa”.

O traballo de localización e edición dos cinco títulos analizados realizouno a profesora, escritora e técnica do Consello da Cultura Galega, Rosa Aneiros, coa colaboración de X. R. Barreiro Fernández. A decisión de acoller estas cabeceiras e non incluir outras posteriores veu determinada, ademais de pola súa importancia histórica, polo non abondoso número de exemplares existentes na actualidade.</font>

Para a iniciativa cotnouse coa colaboración importantísima da Real Academia Galega, e tamén da Biblioteca Naiconal de Galicia, o Museo Santiago Rey Fernández-Latorre, o Arquivo do Reino de Galicia, o Museo de Pontevedra, Andrés Pascual e a Hemeroteca Municipal de Madrid.

Os estudos críticos, incluídos no primeiro dos catro tomos, foron elaborados por: Prudencio Viveiro Mogo (Os promotores dos primeiros diarios galegos: Diario de Santiago e Diario de la Coruña); Rosa Aneiros Díaz e Xosé López García (O nacemento da prnesa diaria galega: as noticias “más ciertas y testimoniadas, oculares” como grande arma contra o invasor); Xosé R. Veiga Alonso (Galiza e a súa presenza nos primeiros diarios galegos); Elías Durán de Porras (Da Coruña a Londres. Os xornais galegos, fonte informativa da prensa e do goberno inglérs na Guerra da Independencia); Xosé Ramón Barreiro Fernández (Palabgra snovas para tempos novos. Aoproximación ao léxico ideolóxico e político do primeiro xornalismo galego (1808-1814) e Jesús de Juana López (As orixes ideolóxicas da oposición francesa (maio, xuño e xullo de 1808). O bispo de Ourense D. Pedro de Quevedo).

Este proxecto editorial continúa a liña de traballo iniciada no ano 2000 polo Consello da Cultura Galega coa edición facsimilar do primeiro fito do xornalismo en Galicia: “El Catón Compostelano” (1800).


<ul><li><a href="http://www.culturagalega.org/noticia.php?id=13207">Pode ver o vídeo da entrevista a Xosé Ramón Barreiro en culturagalega.org</a></li></ul>

imprimir enviar por correo electrÓnico