PLENO

Ramón Yzquierdo Perrín, Real Academia de Belas Artes

Licenciado en Filosofía e Letras, sección de Historia na Universidade de Santiago en xuño de 1970. Doutor en Historia da Arte pola Universidade en setembro de 1976. Desde xuño de 1970 e ata outubro de 1995, formou parte do Departamento de Historia da Arte da Universidade de Santiago en calidade de profesor numerario. Desde esa data, é catedrático de Historia da Arte da Universidade da Coruña, dispensando docencia e levando adiante labores de investigación, centradas na área de Historia da Arte.

En 1989 foi elixido académico correspondente da Real Academia Galega de Belas Artes de Galicia e, en 1993, ocupou o posto de Académico de Número nesta. Desde 1986 colabora habitualmente coa Excma. Deputación Provincial de Lugo, coordinando equipos de investigación dos percorridos dos diferentes Camiños de Santiago no seu tramo lucense e na organización e dirección da maioría das Semanas de Estudios Históricos convocadas e patrocinadas pola Deputación.

Desde a súa constitución, en 1992, forma parte do Consello de Fábrica da catedral de Santiago, participa en congresos nacionais e internacionais de Historia da Arte, en numerosos ciclos de conferencias, reunións científicas, así como na elaboración de proxectos de restauración, informes, e outras actividades nese ámbito. Desde 1995, xunto co profesor Dr. D. Ramón Otero Túñez, ocúpase dos estudios relativos á reconstrucción dunha parte significativa do cadeirado pétreo do coro do Mestre Mateo. En 1997 tivo unha significativa intervención na exposición que sobre a arte medieval tivo lugar na catedral de Ourense, dentro do proxecto Galicia, terra única.

Desde finais dese mesmo ano, en representación da Real Academia Galega de Belas Artes de Galicia, forma parte do Consello da Cultura Galega, e foi integrado nas comisións de Artes Plásticas e Patrimonio Histórico. En 1998 foi nomeado representante do Consello na Comisión Superior de Bens Culturais de Interese para Galicia e, ó ano seguinte, é comisario da exposición Santiago e os Camiños de Santiago. Obra e fotografía de Manuel Chamoso Lamas, que formou parte do programa da Consellería de Cultura dentro do Xacobeo 99.

No ano 2000 foi elixido académico correspondente, da sección de Competentes en Arte, da Real Academia de Bellas Artes de San Fernando e, xa no 2001, pasa a ocupar un posto como membro do Consello da Cultura e n a Excma. Deputación de Lugo. Autor de numerosísimas obras desde 1967, a última delas é Arquitectura románica no municipio de Agolada. XIX Ruta Cicloturística del románico internacional, publicada no ano 2001.