PLENO

Senén Barro Ameneiro, Universidade de Santiago

Naceu en As Pontes, A Coruña en 1962.

Obtivo os graos de licenciado e doutor (premio extraordinario) en Física pola USC. É Catedrático da área de Ciencia da Computación e Intelixencia Artificial desde 1995. É director do Departamento de Electrónica e Computación da USC dende 1993. Membro do Claustro da USC dende 1994 e membro da Xunta de Goberno dende 1996.

Posúe unha ampla experiencia docente en materias de 1º, 2º e 3º ciclo, nas áreas de coñecemento de Electrónica e de Ciencia da Computación e Intelixencia Artificial, e máis no desenvolvemento de contidos docentes en distintos formatos, incluída a docencia virtual. Preocupado por dar a coñecer a todos os niveis a súa disciplina e o seu traballo, no que prioriza os ámbitos multidisciplinares e as aplicacións de interese social (telemedicina, tecnoloxías para o ensino e a aprendizaxe…), imparte conferencias e participa con asiduidade nos medios de comunicación para tratar estes temas.

É editor de cinco libros, autor de preto de 200 artigos científicos, e é membro dos comités científicos e editoriais de numerosos congresos e revistas de ámbito español e internacional. Foi Vocal da "Asociación Española para las Tecnologías y Lógica Fuzzy" e da "EUropean Society for Fuzzy Logic And Technology" entre 1996 e 1999.
Fixo estadías de investigación en diversas Universidades estranxeiras, entre elas: Universidade de South Florida EE.UU (Department of Computer Science and Engineering); Universidade de California, en Berkeley, EE.UU (Department of Electrical Engineering and Computer Sciences); Universidade de Bristol, Reino Unido (Department of Engineering Mathematics).

Fundou e dirixe o Grupo de Sistemas Intelixentes, que conta na actualidade con 24 membros. Dito grupo orienta a súa investigación a múltiples campos (procesamento de sinais, sistemas baseados en coñecemento, robótica móbil, sistemas borrosos intelixentes, e computación neural).