PLENO

Andrés Torres Queiruga, membro electo

Naceu en Aguiño, Ribeira (A Coruña), o 28 de maio de 1940. Cursou os primeiros anos da carreira eclesiástica no Seminario de Santiago de Compostela e logo fixo os cursos de Filosofía e Teoloxía na Universidade Pontificia de Comillas.

Despois da ordenación sacerdotal permaneceu varios anos en Roma para prepara-la súa tese de doutoramento, estancia que combinou co tempo que pasaría en Alemaña en varios centros teolóxicos daquel país. A súa tese de doutoramento versou sobre o pensamento do filósofo e teólogo compostelán Amor Ruibal, tese que mereceu as máximas cualificacións na Universidade Gregoriana.

Profesor de Filosofía da Relixión na Universidade de Santiago de Compostela, foi o coordinador dun equipo de especialistas en Sagradas Escrituras que traduciron a Biblia ó galego. Director da revista Encrucillada. Revista Galega de Pensamento Cristián e membro do Consello da Cultura Galega e da Real Academia Galega desde o 20 de xuño de 1980 é autor de numerosos libros e traballos.

Entre as súas publicacións pódense destacar: Teoloxía e Sociedade (1974), Constitución y evolución del Dogma. La teoría de Amor Ruibal y su aportación (1977), Recupera-la salvación (1977), obra pola que recibiu o Premio da Crítica de 1978 e que foi traducida ó castelán en 1995, Nova aproximación a unha filosofía da saudade (1981), Noción, religación, trascendencia. O coñecemento de Deus en Amor Ruibal e Xavier Zubiri (1990), O inferno a revisión (1995), El problema de Dios en la Modernidad (1998), entre outras.

Colaborou en varias obras colectivas e publicou numerosos artigos en diversas revistas.