PLENO

Santiago Nogueira Romero, Academia de Xurisprudencia e Lexislación de Galicia

Nado en Santiago. Estudiou na Facultade de Dereito da Universidade de Santiago de Compostela, onde se licenciou no ano 1951, coa cualificación de Sobresaliente. No mesmo ano obtivo o premio da Fundación Fernández Carril. Desde entón exerce a profesión de avogado en Santiago de Compostela, e está incorporado ós Colexios de Galicia e Madrid.

Académico fundador e numerario da Academia de Xurisprudencia e Lexislación de Galicia, profesor da Facultade de Dereito da Universidade de Santiago de Compostela durante 24 anos, Santiago Nogueira foi membro primeiro, e logo presidente, do Padroado da Universidade onde exerceu a docencia. Membro do Consello Social da USC na primeira lexislatura foi designado para este posto polo Parlamento mentres que xa na segunda obtivo o posto por designación da Xunta de Galicia.

Director xeral no Ministerio de Cultura durante o segundo mandato de Adolfo Suárez á fronte do Executivo tamén ocupou o posto de conselleiro do Instituto de Reforma y Desarrollo Agrario (IRYDA). Formou parte da Comisión Xestora para a redacción dos Estatutos da Sociedade de antigos alumnos e amigos da Universidade de Santiago e foi vicepresidente na súa primeira Xunta Directiva.

Activo conferenciante en cursos de Dereito Civil, interveu na Comisión non Parlamentaria de Dereito Civil en Galicia, e foi protagonista fundamental da lei de recurso de casación ante o Tribunal Superior de Xustiza de Galicia, lei sobre a que publicou un traballo e deu unha conferencia en Madrid. Neste sentido debe terse en conta que Galicia é a única Comunidade Autónoma que conta cunha Lei especial de Casación.

Habitual colaborador da Revista Xurídica Galega, ten publicados distintos traballos sobre temas de Dereito Procesual, en especial relacionados co recurso de casación.