PLENO

Francisco Río Barja, membro electo

Licenciado en Filosofía e Letras pola Universidade de Santiago e doutor en Xeografía pola Universidade de Madrid (1953). O seu labor docente desenvolveuse tanto na Facultade de Xeografía, onde foi colaborador e compañeiro de D. Ramón Otero Pedrayo, como na Escola Universitaria de Maxisterio, da que foi catedrático de Xeografía e director.

Como profesor especializado, foi contratado polo Instituto de Ciencias da Educación para organizar e dirixir uns vinte cursos de perfeccionamento sobre Didáctica da Xeografía. En 1985 a Consellería de Educación encargoulle a realización da adaptación para Galicia dos "programas de Educación Primaria" que se dispensaron en tódolos grupos escolares.

É autor de máis de 50 traballos sobre xeografía de Galicia, entre os que destacan os seguintes libros: Bibliografía económica de Galicia (Vigo, 1960), Cartografía Xurisdiccional de Galicia no século XVIII (Santiago, 1990), Os ríos galegos. Morfoloxía e réxime (Santiago, 1992), Galicia, esa descoñecida (1999), Estudio económico, histórico e artístico de Villalba (inédito).

Ten participado en numerosos congresos e reunións científicas, tanto nacionais como estranxeiros, e ocupa o cargo de membro numerario da Real Academia Galega, da Academia de Ciencias de Galicia e do Instituto Galaico-Miñoto. Foi director do Instituto de Estudios Galegos Padre Sarmiento e é membro como personalidade electiva do Consello da Cultura Galega.

No campo da investigación recibiu o Premio Valle Inclán e Alfredo Brañas do Centro Galego de Buenos Aires, o Primeiro Premio do Departamento de Seminarios de Lugo; o Premio Galicia de Investigación; o Castelao, da Xunta; e o Trasalba, da Fundación Otero Pedrayo.