  |
Por unha nova cultura forestal fronte aos incendios Conclusións e informes dos debates celebrados no CCG |
||
O ameazador e reiterado impacto dos incendios forestais en Galicia require análise e debate, acerca das causas e das circunstancias que orixinan e propician os lumes, e formulación de medidas e alternativas para intentar neutralizar, ou reducir, un problema de enormes costes ambientais e socioeconómicos. O Consello da Cultura Galega, que xa prestara atención a esta complexa realidade, logo dos incendios do verán de 2005, considerouse obrigado a facelo máis unha vez despois da grande vaga de lumes de 2006. Con esa finalidade convocou a máis de cincuenta expertos que traballaron en tres paneis de debate (Cuestións ecolóxicas e silvícolas; Aspectos económicos, sociais e políticos; Percepción social, educación cívica e información). Os resultados, informes e conclusións destes debates plurais e interdisciplinares ven agora a luz. Os expertos aconsellan a diversificación de especies e usos do monte e afirman a necesidade de acadar un equilibrio entre a redución da biomasa combustible e a integridade do ecosistema. Reclaman un único organismo que xestione, coordine e unifique todas as medidas de conservación e a posta en valor dun monte hoxe maioritariamente abandonado ou mal xestionado. Chaman tamén a atención sobre a conveniencia dunha estratexia de comunicación proactiva, non reactiva, e denuncian a ausencia de coñecemento e de contidos educativos nos centros de ensino sobre os problemas e as potencialidades do monte. En definitiva, apostan por unha mellor percepción do problema por parte da sociedade e por unha cultura silvícola moderna e propia para dar pasos conducentes á superación dun mal que alcanza ao conxunto da sociedade galega.
Desglose por partes Anexos 1. Glosario [pdf]
|
||
