A NOITE ESTÁ VARRIDA DA TERRA

Baixo este significativo nome, o Consello da Cultura Galega, a través da Sección de Ciencia, Tecnoloxía e Sociedade, organiza unha mostra, en colaboración con Unión Fenosa e a Universidade de Santiago, na que se conmemora o 150 aniversario do acendido do arco voltaico en Santiago, feito que acontecía por vez primeira en España no patio da Facultade de Ciencias, no Colexio de Fonseca, no ano 1851. A exposición permanecerá na Igrexa da Universidade, en Santiago, ata o 30 de xuño.

A mostra amosa numerosas pezas procedentes das investigacións dos gabinetes científicos da Universidade de Santiago e doutros centros de ensino secundario. Cun sentido eminentemente didáctico, quérese dar a coñecer a historia da electricidade ó longo do século XIX. (17/04/01)