CARLOS CASARES MOURIÑO
Escritor, catedrático de Literatura, director da Editorial Galaxia,
o terceiro presidente tivo diante o reto da integración
da institución na era das novas tecnoloxías.
Carlos Casares
Mouriño naceu en Ourense no ano 1941 e faleceu o 9 de marzo de
2002. Entrou a formar parte do Plenario do Consello da Cultura
Galega como representante da Real Academia Galega e, tralo pasamento
de Xosé Filgueira Valverde, foi elixido como presidente do Consello
o 14 de outubro de 1996.
Escritor,
catedrático de Literatura, presidente de Honra de ACNUR en Galicia
e director da Editorial Galaxia, participou en encontros de escritores
celebrados en París, Londres, Liverpool, Moscova, Leningrado,
Nova York, Santiago de Chile e Bos Aires, entre outras cidades.
Conferenciante nas universidades de Madrid, Oviedo, Barcelona,
Londres, Trier ou Heidelberg, en 1993 obtivo unha bolsa do Literarisches
Colloquium Berlin para unha estadía dun mes na sede desta organización,
en Wannsee, co obxecto de traballar na súa última novela.
Director da
revista Grial, Casares estivo vencellado ó xornalismo a
través das colaboracións que mantivo en distintos xornais como
El País, El Paseante e outros xornais e revistas
españois e estranxeiros, como a revista Du de Zürich ou,
durante varios anos, a columna diaria que publicaba en La Voz
de Galicia. Carlos Casares obtivo numerosos premios, entre
eles o Premio da Crítica Española en 1975 e 1997 e o Premio da
Crítica Galega en 1982.
Galardoado
novelista
En
1988 foi finalista, xunto con Álvaro Pombo, do Premio Nacional
de Narrativa. No ano 1989 o Goberno de Galicia outorgoulle o máis
alto galardón literario que se concede neste país polo conxunto
da súa obra. Como escritor Casares cultivou o relato breve e a
novela, destacando de entre a súa obra, o libro de contos, Os
escuros soños de Clío, a novela Ilustrísima ou Os
mortos daquel verán.
Os relatos
de Carlos Casares aparecen en numerosas antoloxías e súa última
novela foi Deus sentado nun sillón azul, publicada
en 1996. Ademais de escritor e traductor, mesmo fixo a versión
española das súas novelas e contos, Carlos Casares tamén realizou
traballos de investigación literaria e dirixiu cursos de verán
sobre a a obra de Camilo José Cela.
