O   N O S O   P R O X E C T O   M e m o r i a   d a s   N o s a s   A c t i v i d a d e s

Desde o inicio do noso proxecto (xaneiro do 92), tratamos de establecer contactos con todo o mundo que poida ter materiais ou estar interesado no tema e recadar datos para un inventario dos materiais sonoros que existen no país e nas colectividades emigrantes. Ó tempo, efectuamos copias en soporte dixital (DAT) dalgunhas das máis sobranceiras coleccións, pois para nós conservar os orixinais é irrelevante, o transcendente é a información e non o soporte.  Como característica especial dos fondos sonoros galegos sinalaremos o seu esparexemento, a importancia das coleccións privadas de xentes que gravaron en momentos en que non existían medios institucionais -nomeadamente CRTVG-, a sobranceira importancia dos materiais do mundo da emigración en épocas en que o desenvolvemento tecnolóxico era maior fóra ca en España, e a inexistencia de centros fabricadores de soportes, o que produce moitas veces depósitos legais de fóra de Galicia. Os nosos fondos actuais provenientes de coleccións americanas reúnen varios centos de horas de gravacións de actos desde 1941 -pero sobre todo dos anos 50 a 70-, nunha época da que a penas conservamos gravacións de Galicia. Démoslle prioridade ó traballo centrado nos materiais non editados, pois teñen unha problemática de conservación moi específica. Se dun disco hai mil copias, a gravación dunha conferencia ou dun recital normalmente é exemplar único. Daquela procedemos ó contacto e inventario destes recursos e á reunión de copias cando esto era posible.

© Consello da Cultura Galega, 1999.