O Arquivo Sonoro de Galicia facilita a difusión dos seus fondos sonoros a través da edición dalgunhas das gravacións que considera de maior interese patrimonial e histórico. Este traballo conta, en ocasións, coa colaboración de institucións e medios xornalísticos.

COLECCIÓN AS NOSAS VOCES:
Publicáronse, polo de agora, voces de persoeiros fundamentais da cultura galega que desenvolveron un labor fundamental para a transmisión e a permanencia dos nosos valores culturais en Galicia e na emigración.

A sensibilidade artística de Rafael Dieste, a brillantísima oratoria de Ramón Otero Pedrayo, a morriña apaixoada dende o exilio arxentino de Ramón Suárez Picallo, o ourensanismo de X. Ferro Couselo, a emotividade literaria de Eduardo Blanco Amor son algunhas mostras desta colección. Complétase coa publicación, nos anos en que se dispón, das voces dos persoeiros aos que se lles dedica o Día das Letras Galegas.

	AUDIO DE MOSTRA
Ramón Otero Pedrayo Lembranzas de médicos galegos vistos por un profano. Colexio Médico de Ourense. 1975

	AUDIO DE MOSTRA
Ramón Suárez Picallo Xornadas patrióticas galegas. Bos Aires, 1959.

VOCES LITERARIAS:
O Arquivo Sonoro de Galicia promove gravacións dos nosos escritores contemporáneos, creando así, propiamente, patrimonio sonoro.

	AUDIO DE MOSTRA
Carlos Casares O polbo xigante. Real Academia Galega. A Coruña, 1999

A LINGUA GALEGA:
Non se pode esquecer o vehículo insubstituíble de transmisión da nosa identidade que é a lingua. A estreita colaboración co Instituto da Lingua Galega permitiu a edición de A Nosa Fala.

	AUDIO DE MOSTRA
A nosa fala Bloque occidental . Camelle, 1994

ACTAS:
Por último, as ponencias dos Encontros O Son da Memoria están recompiladas nun volume de actas ao dispor público.