O Observatorio da Comunicación Local ten como obxectivo principal a investigación en comunicación nos ámbitos local e comarcal en Galicia, un ámbito de estudo preferente na Sociedade da Información.

Xunto cos medios xeralistas, xornais e medios audiovisuais de cobertura estatal e autonómica, Galicia conta cunha grande cantidade de iniciativas de comunicación nos ámbitos comarcal e local. O espallamento dos habitantes, que leva á existencia de numerosos núcleos de poboación, provoca a riqueza dun sistema de medios no que conviven o espazo global, que chega a través das novas tecnoloxías, e o local, no que se desenvolven os principios de comunicación comunitaria.

O Arquivo de Comunicación dispón de datos sobre comunicación local e comarcal en Galicia recollidos nos últimos cinco anos. Estes datos permiten a elaboración do Mapa Comarcal de Medios, o primeiro dos proxectos acometidos polo Observatorio. Trátase dunha referencia fiábel, na que se combinan datos referidos ao sistema de medios con con datos que teñen que ver co marco socioeconómico de cada unha das áreas do territorio galego. O contraste e comparación desta información permitirá a elaboración de análises sobre a evolución do xornalismo local e comarcal no país, o seu pasado e as liñas de futuro que se perfilan.

O Observatorio da Comunicación Local é o espazo máis adecuado para que, coa información das bases de datos, poidan estabelecerse conclusións sobre temas variados referentes á profesión xornalística e á cultura comunitaria:

- O nivel de profesionalización dos medios locais.

- As conexións e colaboracións entre os distintos medios.

- Financiamento e comercialización.

- Obxectivos e implicación dos mesmos na vida cultural e social de cada comarca

- Novas definicións do espazo local que transgridan as categorías clásicas de rexional e local e que respecten a variedade xeográfica e poboacional específicas de Galicia.

- Efectos da "glocalización", é decer, a adaptación de modelos comunicativos e empresariais foráneos ao ámbito comarcal galego. Políticas de descentralización dos medios.

_______________________________________________________

Centro de Documentación

Como obxectivo xeral, o Centro de Documentación do Arquivo de Comunicación ten a misión de rexistrar, catalogar e almacenar todos os medios impresos, electrónicos e audiovisuais que existen na actualidade en Galicia co fin de debuxar un mapa mediático dos diferentes sectores xornalísticos.

Este principio artéllase nos seguintes obxectivos concretos:

- Conservar os materiais que se producen en Galicia na área de publicacións periódicas.

- Compilar información sobre os medios que existen en Galicia, pondo especial énfase nos medios de emisión e recepción a pequena escala.

- Facilitar o acceso a toda esta produción a calquera entidade ou persoa que requira estes servizos.

- Ofrecer información respecto da realidade mediática dos diversos sectores xornalísticos.

- Organizar encontros ou xornadas para a posta en común e discusión de experiencias e iniciativas, así como para mellorar a formación dos profesionais.

O Centro de Documentación está a pór as condicións necesarias para o desenvolvemento dos seguintes servizos:

- Consulta directa das bases de datos en sala ou a través da web.

- Lectura en sala de fondos das publicacións periódicas.

- Información pormenorizada das publicacións rexistradas.