O Consello da Cultura Galega e a Consellería de Asuntos Sociais, Emprego e Relacións Laborais da Xunta asinaron un convenio de colaboración para a elaboración dun estudo sobre a situación profesional dos documentalistas dos medios de comunicación en Galicia.

O Aquivo da Comunicación do CCG, consciente do importante papel dos documentalistas na Sociedade da Información, consideraba necesario pór en marcha un estudo que identificase a situación actual do documentalismo nos medios de comunicación. Un interese compartido pola Consellería de Asuntos Sociais, que desexaba contribuír a un mellor coñecemento da situación profesional deste colectivo, tendo en conta a súa especial función de localización e subministro de información para a intermediación no exercizo do dereito á información.

Esta investigación pretende seguir avanzando nun mellor coñecemento da realidade sociolaboral dos profesionais da información, que facilite un mellor coñecemento da situación do sector na Comunidade. Anteriormente e en colaboración coa Dirección Xeral de Relacións Laborais, o CCG realizou na mesma liña os estudos "Condicións laborais e actitudes profesionais nos medios de comunicación" e "Xornalismo en Internet: actitudes profesionais e condicións laborais dos periodistas en liña".

O estudo estará coordinado por María Antonia Pérez, profesora da área de biblioteconomía e documentación da Universidade da Coruña, por Miguel Túñez, decano da Faculdade de Ciencias da Comunicación de Santiago, e por Xosé López, director do Arquivo de Comunicación. Para a sú realización, na que participarán investigadores do Arquivo de Comunicación, o Consello da Cultura Galega aportará 3.000 euros e a Consellería 6.000.