O Arquivo de Comunicación ten como principal obxectivo o estudo dos fenómenos comunicativos do sistema galego de medios, mediante a recollida sistemática de datos e a súa posterior análise e interpretación.

Naceu no ano 2000 co propósito de estabelecer un censo das publicacións periódicas editadas en Galicia, sobre todo de difusión a pequena escala, e recollelas en formato papel para a creación dunha hemeroteca. Esta concepción inicial foi ampliándose para dar cabida aos medios audiovisuais e ás publicacións periódicas da rede até conformar un panorama completo do sistema de medios en Galicia.

O Arquivo está organizado en tres bases de datos nas que se recollen, respectivamente, as publicacións periódicas impresas, os medios audiovisuais e os medios electrónicos. Na actualidade dispoñen duns 2.150 rexistros, sendo a máis ampla a de prensa en papel, que conta cuns 1.800 rexistros.

Cada un destes rexistros pretende compilar a maior cantidade posíbel de información sobre cada publicación. Son datos pormenorizados, organizados en 76 campos, sobre a súa edición, impresión, temática, obxectivos, lingua, periodicidade, financiamento e outras características físicas e de contido. A diversidade de campos da base de datos permite aos investigadores realizar achegas interdisciplinares nas que se combinan distintos aspectos do hipersector da comunicación.

Metodoloxía de traballo. Etapas:

- Traballo de campo, que consiste na revisión diaria da prensa xeralista e especializada e na navegación pola rede para ter noticia do nacemento de novos medios ou de modificacións nos xa existentes.

- Recollida de material. Para esta función, o Arquivo de Comunicación mantén unha relación fluída coas publicacións rexistradas para ter datos de primeira man e manter actualizada a información. O contacto cos medios faise por medio do e-mail ou do teléfono, que se probaron como os métodos máis efectivos.

O traballo de recollida de información e da súa posterior análise non é unha tarefa pechada. A imposibilidade da súa clausura devén do forte dinamismo do sistema de medios galego, no que se producen continuas transformacións empresariais, tecnolóxicas e profesionais.

Por este motivo, os membros do Arquivo solicitamos a colaboración dos editores e dos usuarios en xeral. Poñemos á súa disposición un formulario en liña no que nos pode indicarnos a existencia de novas publicación ou posíbeis cambios nelas. Unha vez cuberto, deberá enviarnos este documento ao enderezo electrónico acg@consellodacultura.org. O Arquivo de Comunicación porase en contacto co editor para a confirmación de datos.

Formulario (Documento de Word)